Na John Bukuku, Dar es Salaam
Mamlaka ya Hali ya Hewa Tanzania (TMA) imetoa taarifa kuhusu kuongezeka kwa viwango vya joto katika maeneo mbalimbali nchini hasa katika mikoa inayopata misimu miwili ya mvua kwa mwaka kutokana na mabadiliko ya mzunguko wa Jua la Utosi pamoja na upungufu wa mvua katika kipindi cha miezi ya karibuni.
TMA imesema kuwa vipindi vya Jua la Utosi nchini hufikia kilele mwishoni mwa mwezi Novemba wakati Jua likielekea kusini (Tropiki ya Kaprikoni) na hurudi tena Februari wakati Jua likielekea kaskazini (Tropiki ya Kansa). Katika kipindi hiki uso wa Dunia kwenye maeneo husika huwa karibu zaidi na jua na hivyo kusababisha ongezeko la joto.
Kwa mujibu wa taarifa hiyo hadi kufikia tarehe 27 Novemba 2025 baadhi ya vituo vya hali ya hewa vimeripoti viwango vya juu vya joto ikilinganishwa na wastani wa muda mrefu wa kipindi cha Novemba. Miongoni mwa vituo hivyo ni pamoja na kituo cha Moshi (Kilimanjaro) kilichoripoti kiwango cha juu cha 35.7°C tarehe 21 Novemba ikiwa ni ongezeko la 4.2°C juu ya wastani. Kituo cha Ilonga (Morogoro) kiliripoti 35.5°C tarehe 20 Novemba ikiwa ni ongezeko la 2.7°C. Kituo cha Morogoro mjini kilirekodi 34.5°C tarehe 26 Novemba ikiwa ni ongezeko la 2.3°C. Kituo cha Ibadakuli (Shinyanga) kilirekodi 33.6°C tarehe 14 Novemba ikiwa ni ongezeko la 2.2°C na Dar es Salaam ilirekodi 33.2°C tarehe 19 na 20 Novemba ikiwa ni ongezeko la 1.6°C.
TMA imeongeza kuwa ongezeko la unyevu angani hususan katika maeneo ya pwani limesababisha watu kuhisi joto kali zaidi ya kiwango halisi kinachopimwa.
Hata hivyo mamlaka hiyo imetaja kuwa kuanzia mwezi Desemba 2025 vipindi vya mvua vinatarajiwa kujitokeza katika maeneo mengi nchini hatua itakayochangia kupungua kwa joto hasa katika maeneo yanayopata misimu miwili ya mvua kwa mwaka.
TMA imewataka wananchi kuendelea kufuatilia taarifa za hali ya hewa pamoja na tahadhari zinazotolewa sambamba na kupata ushauri kutoka kwa wataalam wa sekta husika ili kupunguza athari zinazoweza kujitokeza kutokana na mabadiliko ya hali ya hewa.
🥃🍶 TUMIA VINYWAJI BORA VYA EAST AFRICAN SPIRITS – BEI RAFIKI, LADHA SAFI BILA HARUFU MBAYA
Wasiliana nasi:
📍 East African Spirits (T) Ltd
📞 +255 767 650 806 | +255 652 096 254
Post a Comment