Katibu Mkuu wa Wizara ya Habari, Utamaduni, Sanaa na Michezo, Gerson Msigwa, ameitaka tasnia ya habari nchini kuongeza uzalishaji wa habari zinazohusu maisha ya wananchi wa vijijini, akieleza kuwa maeneo hayo yanahitaji kupewa nafasi kubwa zaidi katika vyombo vya habari kutokana na idadi kubwa ya Watanzania wanaoishi huko.

Msigwa amesema takwimu za miaka mitano iliyopita zinaonesha kuwa zaidi ya asilimia 65 ya Watanzania wanaishi vijijini, wakati zaidi ya asilimia 80 ya vyombo vya habari vimejikita mijini, hali inayodhihirisha umuhimu wa kuimarisha uandishi wa habari unaowapa wananchi wa maeneo hayo uwakilishi unaostahili.

Ametoa wito huo Oktoba 31, 2026, jijini Dodoma, wakati akifungua Mkutano Mkuu na Kongamano la Mwaka la Tathmini ya Huduma za Habari na Mawasiliano Vijijini lililoandaliwa na Chama cha Waandishi wa Habari Vijijini Tanzania (RUJAT).

Amesema waandishi wa habari wanapaswa kwenda zaidi ya kuripoti mikutano na matamko ya viongozi, badala yake kufanya utafiti na uchunguzi unaobaini changamoto zinazowakabili wananchi na kuibua masuala yanayoweza kuchochea upatikanaji wa ufumbuzi.

Katika hatua nyingine, Msigwa amesisitiza kuwa waandishi wa habari wanapaswa kurejesha nafasi yao katika kuhabarisha umma kwa kuzingatia weledi na maadili ya taaluma, akieleza kuwa jukumu la kutoa taarifa kwa wananchi halipaswi kuachwa kwa wanaharakati ambao wakati mwingine husimamia ajenda maalumu.

Amesema taarifa zinazochapishwa au kurushwa na vyombo vya habari zinaweza kuwa na mchango katika kujenga au kudhoofisha taifa, hivyo wanahabari wanapaswa kutumia kalamu zao kwa uwajibikaji na kulinda maslahi ya nchi bila kujali tofauti zilizopo.

Msigwa pia ameitaka RUJAT kufanya utafiti kuhusu sababu zinazochangia kupungua kwa ushawishi wa vyombo vya habari kwa wananchi ili kubaini namna bora ya kurejesha imani na usikivu wa jamii kupitia habari zinazogusa maisha yao.

Ameeleza kuwa Serikali itaendelea kushirikiana na sekta ya habari katika kuboresha mazingira ya kazi kwa wanahabari, huku akisisitiza umuhimu wa kuimarisha uchumi wa vyombo vya habari na waandishi ili kulinda uhuru na weledi wa taaluma.

Kwa upande wake, Mwenyekiti wa RUJAT, Neville Meena, amesema chama hicho kinalenga kubadilisha mwelekeo wa uandishi wa habari za vijijini kwa kuhakikisha wananchi wanapewa nafasi ya kueleza changamoto, mahitaji na mafanikio yao, badala ya habari nyingi kujikita katika mikutano na matamko ya viongozi.

Meena amesema RUJAT pia imeweka mkazo katika kuimarisha uwezo wa wanachama wake kupitia mafunzo yanayohusu uandishi wa habari za vijijini, matumizi ya teknolojia na akili unde (AI), ili kuongeza ubora wa maudhui yanayozalishwa.

Naye Katibu wa RUJAT, Prosper Kwigize, amesema chama hicho kilichoanzishwa mwaka 2020 kimekua kutoka wanachama waanzilishi 20 hadi kufikia wanachama 120, huku kikiwa na maombi zaidi ya 60 kutoka kwa waandishi wanaotaka kujiunga.

Amesema katika mikakati yake, RUJAT inalenga kuimarisha uwezo wa wanachama, kujenga ushirikiano kati ya waandishi wa mikoa mbalimbali na kuongeza nafasi ya habari za vijijini katika majukwaa ya habari.

Kwigize ameongeza kuwa chama hicho kinapanga kuanzisha tuzo maalumu za uandishi wa habari za vijijini mwaka 2027 kwa lengo la kutambua waandishi wanaozalisha habari zenye kina na matokeo kwa jamii.

Katika kongamano hilo, Mbunge wa Bunda Mjini, Ester Bulaya, ambaye pia ni mwandishi wa habari mwandamizi, amepongeza kuanzishwa kwa RUJAT akieleza kuwa chama hicho kina nafasi ya kusaidia kupaza sauti za wananchi wanaoishi vijijini.

Katibu Mkuu wa Wizara ya Habari, Utamaduni, Sanaa na Michezo, Gerson Msigwa.

Mwenyekiti wa RUJAT, Neville Meena

Katibu wa RUJAT Prosper Kwigize

Mbunge wa Bunda, Esther Bulaya, ambaye pia ni mwandishi wa habari kitaaluma, akizungumza wakati wa Kongamano na Mkutano Mkuu wa Mwaka wa Chama cha Waandishi wa Habari za Vijijini Tanzania (RUJAT), jijini Dodoma, Oktoba 31, 2026.