ASKOFU MABUSHI WA KANISA LA IEAGT AWAASA VIJANA KULETA MABADILIKO CHANYA

Askofu Mkuu wa Kanisa la International Evengelical Assemblies of God Tanzania IEAGT Askofu David Mabushi akifundisha neno la Mungu wakati wa ufunguzi wa kongamano la Kitaifa la vijana wa kanisa hilo.

Na Stela Paul Shinyanga

Askofu Mkuu wa Kanisa la International Evengelical Assemblies of God Tanzania IEAGT Askofu David Mabushi amewaasa vijana kujitambua ili kuleta mabadiliko chanya katika familia,kanisa na taifa kwa ujumla ikiwa ni pamoja na kumtanguliza Mwenyezi Mungu.

Askofu Mabushi ametoa wito huo leo Disemba 13,2022 wakati akifungua Kongamano la Kitaifa la Vijana wa kanisa hilo ambao ni Wajumbe wa Injili Kimataifa IGM, na kwamba amesema vijana wanayo nafasi kubwa ya kuleta mabadiliko.

Askofu Mabushi amesema ili vijana waweze kuleta mabadiliko yenye tija wanapaswa kujengewa ufahamu na maarifa ya kutosha kupitia mafundisho mbalimbali ambayo yanalenga kujenga na kuimarisha vijana kwaajili ya kutambua wajibu wao.

“Tumezaliwa tulete mabadiliko kwahiyo pale ulipo jukumu moja wapo ulilonalo ni kuhakikisha kwamba kuleta mabadiliko, na baada ya kutoka kwenye kambi hii mpeleke mabadiliko mahali mlipozaliwa ni vibaya sana kwa kijana yale aliyoyakuta ndio hayo anayaendeleza” Amesema Askofu Mabushi.

“Na hayo mabadiliko ni vizuri ukayaelekeza kwa Mungu ili ujana wako ukawe na faida mbele za Mungu, kijana anayetaka kuleta mabadiliko lazima awe na ufahamu na maarifa vinginevyo hawezi kubadilisha ulimwengu huu” Amesema Askofu Mabushi.

Kwa upande wake Mkurugenzi wa Idara ya Vijana Taifa Baraka Mollel amesema lengo la Kongamano hilo ni kuwajenga vijana uwezo wa Kimungu ili waweze kujitambua na kufahamu wajibu wao ndani ya kanisa na taifa kwa ujumla.

“ Lengo letu kubwa ni kuwafundisha vijana ili wajijuwe na kujitambua ni kina nani wakawe chachu ya mabadiliko walikotoka kwenye nchi pia hata kwenye kanisa, vijana watakaokuja kwenye kongamano hili lazima kwanza wawe tayari kubadilika” Amesema Baraka.

Nao baadhi ya Vijana waliohudhuria kongamano hilo wameeleza namna walivyojiandaa ili kuhakikisha wanapata maarifa ya Kimungu ambayo yatawasaidia kuleta mabadiliko katika familia, kanisa na taifa kwa ujumla.

Kongamano la kitaifa la Vijana wa Kanisa la IEAGT limefunguliwa rasmi leo Disemba 13,2022 na linatarajia kuhitimishwa Disemba 16,2022 na kwamba kongamano hilo linafanyika katika kanisa la IEAGT Mjini Shinyanga.