MAGAZETI YA LEO ALHAMIS NOVEMBA 27, 2025

Na mwandishi wetu

Katika harakati za kufikisha elimu ya afya kwa jamii hasa waishio vijijini, Hospitali ya Rufaa Nkinga iliyopo wilaya ya Igunga mkoani Tabora imeendelea kujenga uhusiano mzuri kwa jamii inayoizunguka kwa kudhamini michezo mbambali inayoandaliwa na shule za sekondari katika wilaya ya Igunga huku ikitoa elimu ya Afya.

Akizungumza katika mashindano ya Umiseta ngazi ya tarafa yaliyofanyika shule ya sekondari Mwanzugi iliyopo wilaya Igunga tarafa ya Igunga kata ya Mwanzugi mwanzoni mwa wiki hii, mratibu wa michezo mwalimu Msungu Taikonakutamba amesema ‘‘Lengo la mashindano haya nikwaajili ya kutengeneza timu ya tarafa ili twende kushindana na timu zingine za tarafa za Simbo, Manonga na Igurubi’’

Mwalimu Taikonakutamba amesema timu zilizoingia fainali upande wa mpira wa miguu kwa wavulana ni Nanga Sekondari na Mwanzugi Sekondari, mpira wa miguu upande wa wasichana ni Kininginira Sekondari na Igunga Day Sekondari huku mpira wa pete wakiingia Mwanzugi Sekondari na Nanga Sekondari.

Aidha mwalimu Taikonakutamba ameishukuru Hospitali ya Rufaa Nkinga pamoja na chuo cha uuguzi cha Nkinga kwa kudhamini mashindano hayo kwani yamewapa hamasa kubwa wanafunzi na kuifurahia michezo.

Naye mwakilishi wa Hospitali ya Rufaa Nkinga ndugu John Msafiri amesema ‘‘Nkinga Hospitali tumekuwa tukidhamini mashindano haya kwa ngazi ya tarafa mpaka wilaya na tumekuwa tukitoa jezi kwa mshindi wa kwanza katika mchezo wa mpira wa miguu kwa wavulana na wasichana, na tunafanya haya kwakuwa tumeona kuna umuhimu sisi kama Hospitali kushiriki na jamii hasa wilaya inayotuzunguka ya Igunga’’ 

‘‘Tunafanya hivi ili kuhamasisha michezo kwa wanafunzi ndio maana tupo hapa umbali wa zaidi ya 90km toka ilipo Hospitali yetu, sisi tupo hapa leo lakini kuna michezo mingine kama hii inayoendelea tarafa ya Mwisi muda huu na kesho (leo) tunaendelea katika tarafa ya Manonga na Igurubi’’ Alisema ndugu Msafiri

Ndugu Msafiri amesema pamoja na kuhamasisha michezo kwa wanafunzi pia hutoa elimu ya uchangiaji damu kwa wanafunzi juu ya umuhimu wa uchangiaji damu, na huwaomba kuchangia damu katika benki ya damu ya Hospitali kwa lengo la kuokoa maisha ya watanzania ambao hufika Hospitali ya Rufaa Nkinga wakiwa na uhitaji wa damu.

Kwa miaka sasa Hospitali ya Rufaa Nkinga imekuwa ikifadhili michezo ya namna hii kuanzia ngazi ya tarafa hadi wilaya, huku ikitoa zawadi kwa washindi kama vile jezi na zawadi zinginezo.

Hospitali ya Rufaa Nkinga inamilikiwa na kanisa la The Free Pentecostal Church of Tanzania (FPCT) na ipo wilayani Igunga 21km toka barabara kuu ya Ziba inayoelekea Singida ukiwa unatoka Nzega.