Na Mapuli Kitina Misalaba
Chama cha Waandishi wa Habari za Vijijini (RUJAT), kimehimiza wamiliki na viongozi wa Radio kuongeza juhudi ya kuwatambua, kuwajengea uwezo na kuwahudumia waandishi wa habari.
Chama hicho kinaungana na wanahabari, wamiliki na viongozi wa radio nchini Tanzania, Afrika Mashariki na dunia kote leo katika kukumbuka siku ya Radio Duniani ambayo huadhimishwa kila Mwaka Februari 13.
RUJAT kimekuwa sehemu ya kutambua na kuunga mkono kauli mbiu ya mwaka huu wa 2024 ambayo inasema: “Redio: Karne ya kuhabarisha, kuburudisha na kuelimisha.”
Kwa kuzingatia kauli mbiu hiyo RUJAT kinawakumbusha umma, viongozi na wamiliki wa vyombo vya habari hususani radio kuwa, radio ni jumuiko la kitaaluma, jengo na mitambo ambayo huongozwa na waandishi wa habari hivyo ni muhimu kuwajengea uwezo na kuwahudumia ili waweze kutimiza malengo yaliyokusudiwa.
Kimesema hatua hiyo itaziwezesha radio kupata maudhui sahihi na yenye viwango bora, yatakayosaidia kutafsiri mahitaji ya mawasiliano ya umma na kutatua changamoto za kijamii.
Pia kimesisitiza kuzingatia maendeleo ya ukuaji wa kasi wa teknolojia na ujio wa akili bandia (Artificial Intelligence - AI) ili wasimamizi wa radio wasiachwe nyuma katika maendeleo hayo.
Chama cha waandishi wa habari vijijini ni chimbuko la habari nyingi ambazo zikitumika radioni zinaakisi uhalisia na kutafsri kauli mbiu ya mwaka huu.
Chama cha Waandishi wa Habari za Vijijini (RUJAT), kinawatakia watu wote maadhimisho mema ya siku ya radio duniani mwaka 2024.
Post a Comment