Afisa elimu wa mkoa wa Kigoma Paulina Ndigeza akizungumza siku ya elimu ya Halmashauri ya Wilaya ya Kasulu, kulia kwake ni afisa elimu wa Halmashauri hiyo Elestina Chanafi. Na Respice Swetu, Misalaba Media -Kasulu
Halmashauri
ya wilaya ya Kasulu mkoani Kigoma, ina upungufu wa walimu 1328 wa shule za
msingi na sekondari ambapo kati yao, walimu 1194 ni wa shule za msingi na 134
ni wa sekondari.
Hayo
yamebainika wakati wa kikao cha siku ya elimu cha halmashauri ya wilaya ya
Kasulu kilichofanyika kwenye ukumbi wa chuo cha ualimu Kasulu.
Akisoma taarifa
ya sekta ya elimu ya halmashauri hiyo, afisa elimu taaluma wa sekondari Mussa
Kanyoye amesema, halmashauri ya wilaya ya Kasulu yenye shule za msingi 89 za
serikali na 24 za sekondari, ina jumla ya walimu 957 wanaofundisha elimu ya
awali na msingi huku walimu 331 wakiwa ni wa sekondari.
Taarifa hiyo
ilibainisha kuwa, idadi hiyo ni pungufu ikilinganishwa na mahitaji halisi ya
walimu 2151 kwa elimu ya awali na msingi na walimu 466 wanaohitajika kwa shule
za sekondari na kufanya kuwa na uwiano wa mwalimu mmoja kwa wanafunzi 93 kwa
elimu ya awali na msingi tofauti na uwiano
unaotakiwa wa mwalimu mmoja kwa wanafunzi 45.
Kwa upande
wa shule za sekondari, taarifa hiyo imetabanaisha kuwa, uwiano uliopo ni wa
mwalimu mmoja kwa wanafunzi 49 badala ya mwalimu mmoja kwa wanafunzi 40.
Kwa upande
wa miundo mbinu, halmashauri ya wilaya ya Kasulu iliyo na wanafunzi 89182 wa elimu ya awali na msingi
na wanafunzi 16138 wa sekondari, ina upungufu mkubwa wa vyumba vya madarasa,
nyumba za walimu, matundu ya vyoo na samani.
Kuhusu
taaluma, taarifa ya sekta ya elimu ya halmashauri hiyo imeeleza kuwa,
halmashauri ya wilaya ya Kasulu ilishika nafasi ya pili kati ya halmashauri
nane za mkoa wa Kigoma kwenye mtihani wa kuhitimu darasa la saba baada ya watahiniwa
5342 kufaulu mtihani huo kati ya watahiniwa 6119 waliofanya ikiwa ni sawa
na asilimia 87.3 ya ufaulu.
Kana kwamba
hiyo haitoshi, kwa mara nyingine katika matokeo ya mtihani wa upimaji wa darasa
la nne halmashauri ya wilaya ya Kasulu imeshika nafasi ya pili kati ya
halmashauri nane baada ya watahiniwa 6039 kufaulu kati ya watahiniwa 7241 walifanya
mtihani huo ikiwa ni sawa na asilimia 83.4 ya ufaulu.
Pamoja na kufanya
vizuri kwenye mitihani hiyo, halmashauri hiyo imefanikiwa pia katika mitihani
ya ngazi ya sekondari ambapo katika mtihani wa kidato cha pili, halmashauri ya
wilaya ya Kasulu ilifaulisha kwa
asilimia 86, kidato cha nne asilimia 89.48 huku ufaulu wa kidato cha sita ukiwa
ni wa asilimia 100.
Akizungumza
wakati wa kuahirisha kikao hicho, afisaelimu wa mkoa wa Kigoma Paulina Ndigeza aliyekuwa
mgeni rasmi, amewapongeza viongozi, wazazi, walimu na wadau wa elimu wa
halmashauri ya wilaya ya Kasulu kwa ushirikiano na kazi nzuri waliyoifanya.
Post a Comment