MAHAFALI YA TATU ANGEL GABRIEL DAY CARE YAADHIMISHWA KWA MAFANIKIO MAKUBWA SHINYANGA

Na Mwandishi wetu, Misalaba Media

Sherehe ya mahafali ya tatu ya Angel Gabriel Day Care iliyopo Manispaa ya Shinyanga imefanyika na kukutanisha wazazi, walezi, walimu na wageni waalikwa kwa ajili ya kusherehekea safari ya ukuaji wa watoto wanaohitimu mwaka huu.

Katika sherehe hiyo, lisala ya kituo ilisomwa na Fadhili Issa Itambu, ambaye ni mwakilishi wa Mkurugenzi wa kituo Bi. Damary Jilungu Mollesi. Akiisoma lisala hiyo,

Alifafanua historia ya kituo, alieleza kuwa Angel Gabriel Day Care ilianzishwa mwaka 2022 kwa dhamira ya kutoa malezi bora, elimu ya awali yenye ubora, ulinzi na usalama kwa watoto. Alibainisha kuwa katika kipindi kifupi, kituo kimekua kwa kasi na kimeweza kulea watoto kimwili, kiakili, kijamii na kiroho kupitia misingi ya upendo, nidhamu, utii na ubunifu.

Lisala hiyo ilieleza mafanikio mbalimbali ambayo kituo kimeyapata, ikiwemo:

Kuongeza uwezo wa watoto kusoma, kuandika na kuhesabu kwa lugha ya Kiingereza.
Kuwajengea watoto ujasiri, maadili, stadi za kazi ndogo ndogo na uwezo wa kuwasiliana.
Kuendesha matukio muhimu kama Friendship Day, Learning Beyond Classroom, ziara za viwanda, Supermarket, Jambo Zoo na sherehe za kukuza vipaji.
Kuendelea kupokea pongezi kutoka serikalini, ikiwemo kutembelewa na Afisa Mkuu wa Ustawi wa Jamii nchini pamoja na uteuzi wa Mkurugenzi kuwa Mwenyekiti wa Day Care za Wilaya ya Shinyanga na Mjumbe wa Halmashauri Kuu ya Taifa ya Day Care.

Aidha, alieleza mafanikio ya kuongeza madarasa ya kisasa, kupata walimu wenye taaluma na kuongeza vifaa vya kielektroniki vya kujifunzia pamoja na usafiri wa watoto.

Baadhi ya changamoto zilizotajwa ni pamoja na upungufu wa vifaa vya michezo, mahitaji ya vyombo vya muziki na gharama za uendeshaji ikiwa ni pamoja na kupanda kwa bei za chakula na usafiri.

Lisala hiyo iliainisha malengo ya mwaka 2026 ambayo ni pamoja na:

Kutoa huduma bora zaidi za malezi,
Kuimarisha huduma za afya kupitia ukaguzi wa kitabibu kila baada ya miezi mitatu,
Kuongeza kamera za ulinzi,
Kuanzisha sera ya ulinzi na usalama wa mtoto (Child Protection Policy).

Baada ya lisala hiyo, mwakilishi wa mgeni rasmi, Jovin Machumu, alitoa salamu na kusisitiza umuhimu wa elimu kama urithi pekee mzuri mzazi anaoweza kumpa mtoto. Alieleza kuwa mali, nyumba na mashamba huweza kupotea, lakini elimu humjengea mtoto mustakabali thabiti. Aliushukuru uongozi wa kituo kwa malezi mazuri, elimu yenye maadili na kuwafundisha watoto hofu ya Mungu.

Katika sherehe hiyo, watoto waliohitimu walionesha uwezo wao kupitia mijadala ya Kiingereza, maonesho ya maarifa, michezo mbalimbali na ubunifu, ikiashiria msingi bora uliowekwa na walimu wa kituo. Pia, mgeni rasmi alitoa mchango wa shilingi milioni moja kwa ajili ya kuunga mkono juhudi za kituo hicho.

Sherehe ilihitimishwa kwa pongezi kwa wazazi wote na wito wa kuendelea kushirikiana malezi mema, kuwalinda watoto dhidi ya mazingira hatarishi na kuendelea kutangaza sifa njema za Angel Gabriel Day Care. Watoto wanaohitimu walitakiwa heri na baraka wanapoanza hatua mpya ya elimu.