MISALABA MEDIA YAANZISHA KIKUNDI CHA SHY TALENT FILMS KUIBUA VIPAJI NA KUJENGA WASANII WA KESHO

Taasisi ya habari ya Misalaba Media imeanzisha kikundi cha sanaa kinachoitwa SHY TALENT FILMS, chenye lengo la kuibua vipaji, kutengeneza filamu na tamthilia zenye ujumbe wa kuelimisha jamii, pamoja na kutoa fursa kwa vipaji mbalimbali ikiwemo waigizaji wa maigizo, filamu na wachekeshaji (stand up comedy).

Hatua hiyo inalenga kutumia sanaa kama nyenzo ya kuhamasisha mabadiliko chanya katika jamii, huku ikitoa jukwaa la wazi kwa vijana wenye vipaji kuonyesha uwezo wao na kujijenga kitaaluma.

Leo Januari 10, 2026, Misalaba Media imefanikiwa kufanya kikao cha pamoja na baadhi ya watu watakaoshiriki katika shughuli za kikundi hicho, ambapo kikao hicho kimehudhuriwa na jumla ya watu 30.

Katika kikao hicho, washiriki wamekubaliana mambo mbalimbali ya msingi ikiwemo kuanza maandalizi ya kusajili kikundi cha SHY TALENT FILMS ili kiwe rasmi kisheria na kufanya kazi zake kwa utaratibu unaotambulika.

Akizungumza katika kikao hicho, Mkurugenzi wa Misalaba Media, Mapuli Misalaba, amesema kuanzishwa kwa SHY TALENT FILMS ni sehemu ya dhamira ya taasisi hiyo kupanua wigo wa kazi zake kwa kugusa moja kwa moja maendeleo ya vijana na jamii kwa ujumla kupitia sanaa yenye maudhui yenye maana na mwelekeo wa kijamii.

Kwa upande wake, Meneja wa Misalaba Media ambaye pia ni Katibu wa kikundi hicho, Daniel Sibu, amesema SHY TALENT FILMS itakuwa jukwaa la kujifunza, kukuza vipaji na kutoa nafasi kwa waigizaji wachanga kushiriki katika kazi za kitaalamu za filamu na tamthilia, huku akisisitiza nidhamu, mshikamano na ubora wa kazi.

Naye Mwenyekiti wa SHY TALENT FILMS, Daniel Elimboto, ameeleza kuwa kikundi hicho kimejipanga kufanya kazi kwa weledi, uwazi na ubunifu, akisema lengo si burudani pekee bali kuibua vipaji vitakavyoleta mchango chanya kwa jamii na sekta ya sanaa kwa ujumla.

Aidha, baadhi ya waigizaji na washiriki waliohudhuria kikao hicho wameishukuru na kuipongeza Misalaba Media kwa wazo hilo, wakieleza kuwa ni fursa adhimu ambayo kwa maeneo mengi bado haijakuwepo.

Wamesema hapo awali baadhi yao waliwahi kujiunga na makundi au vikundi vingine vya maigizo, lakini hawakuweza kuona mafanikio wala maendeleo ya vipaji vyao, hali iliyowakatisha tamaa.

Hata hivyo, washiriki hao wameeleza kuwa wana imani na matumaini makubwa kwa Misalaba Media kutokana na uzoefu wake katika tasnia ya habari, nidhamu ya kazi na mwelekeo wake wa kuzingatia maendeleo ya vijana na jamii ambapo wamesema wanaamini kupitia SHY TALENT FILMS, vipaji vyao vitapata mwelekeo, malezi na fursa za kweli za kujitambua na kufanikiwa.

Misalaba Media kupitia SHY TALENT FILMS inawaomba wadau mbalimbali, wakiwemo taasisi za umma na binafsi, mashirika yasiyo ya kiserikali, wafanyabiashara, wadau wa sanaa pamoja na watu binafsi, kujitokeza kuiunga mkono initiative hii ili kufanikisha malengo yaliyojiwekea.

Ushirikiano huo unaweza kuwa kupitia mafunzo, vifaa, ufadhili wa miradi ya filamu na tamthilia, au kushirikiana katika kampeni za kijamii zitakazotumia sanaa kama chombo cha mabadiliko.

Misalaba Media ni chombo cha habari cha mtandaoni kilichosajiliwa kisheria, kinachojishughulisha na ukusanyaji, uchakataji na usambazaji wa habari, pamoja na kuona fursa za kutumia sanaa na ubunifu kama nyenzo ya kuelimisha, kuhamasisha na kuijenga jamii.

Platform hii si ya burudani tu, bali ni chombo cha mabadiliko ya jamii, kiwanda cha talanta, na daraja la waigizaji wachanga kuelekea ndoto zao.

Kwa taarifa zaidi, tembelea ukurasa wetu mpya wa Instagram: SHY TALENT FILMS

“Kuibua vipaji leo, Kujenga wasanii wa kesho”

Mkurugenzi wa Misalaba Media, Mapuli Misalaba akizungumza kuhusu dhamira ya Misalaba Media kuanzisha SHY TALENT FILMS kwa ajili ya kuibua vipaji na kuijenga jamii kupitia sanaa.

Mwenyekiti wa SHY TALENT FILMS, Daniel Elimboto, akizungumza kuhusu malengo ya kikundi na umuhimu wa ushirikiano katika kufanikisha sanaa yenye tija kwa jamii.

Meneja wa Misalaba Media ambaye ndiye Katibu – SHY TALENT FILMS Daniel Sibu akiwaongoza washiriki katika mchezo wa kuamsha mwili na kuburudisha, kabla ya kuendelea na kikao cha kupanga mwelekeo wa SHY TALENT FILMS.