Tanzania na Urusi zimeingia katika ukurasa mpya wa ushirikiano wa kiteknolojia unaolenga kuwainua vijana na kuchochea maendeleo ya kiuchumi kupitia matumizi ya teknolojia za kisasa (High-Tech).
Hatua hiyo imefikiwa kufuatia kutiliana saini kwa Hati ya Makubaliano (MoU) kati ya taasisi ya Innopraktika kutoka Urusi, inayounganisha makampuni zaidi ya 142 ya teknolojia, na kampuni ya Gen Z Corporation Limited ya hapa nchini. Makubaliano hayo ni kielelezo cha utekelezaji wa Sera Mpya ya Mambo ya Nje inayoweka msisitizo katika diplomasia ya uchumi na ubunifu.
Waziri wa Mambo ya Nje na Ushirikiano wa Afrika Mashariki, Balozi Mahmoud Thabit Kombo, amebainisha kuwa ushirikiano huu umekuja wakati muafaka ambapo dunia inaendeshwa na kasi ya mabadiliko ya kidijitali.
Akizungumza jijini Dar es Salaam, Waziri Kombo alisisitiza kuwa teknolojia hizi si tu alama ya maendeleo, bali ni chombo muhimu cha kupunguza umaskini na kurahisisha upatikanaji wa huduma za msingi kama elimu, masoko ya bidhaa, na huduma za kifedha. Kwa vijana, hii ina maana ya kufunguka kwa milango ya ajira zinazoendana na soko la sasa la kidunia.
Moja ya mafanikio makubwa katika makubaliano haya ni mpango wa kuanzisha Kituo cha Teknolojia (Technology Hub) nchini Tanzania. Kituo hiki kinatarajiwa kuwa chachu ya kuifanya Tanzania kuwa kitovu cha Teknolojia ya Habari na Mawasiliano (TEHAMA) katika ukanda wa Afrika Mashariki na Kati. Kwa vijana wabunifu, kituo hiki kitakuwa ni jukwaa la kupata ujuzi kutoka kwa wataalam wa kimataifa, kufanya majaribio ya mifumo mipya, na kukuza biashara zao za kidijitali (Startups) ambazo ni injini ya uchumi wa kisasa.
Sekta za kielelezo kama kilimo, madini, usafirishaji, na maliasili zinatarajiwa kufanyiwa mageuzi makubwa kupitia teknolojia hizi za kisasa.
Mkurugenzi Mtendaji wa Innopraktika, Bwana Alexander Likhanov, ameeleza kuwa ushirikiano huo utalenga kuongeza ufanisi wa kazi, jambo ambalo litaongeza tija katika uzalishaji. Mathalani, katika sekta ya kilimo, teknolojia inaweza kusaidia wakulima vijana kupata taarifa za hali ya hewa na masoko kwa usahihi, hivyo kuongeza kipato na usalama wa chakula nchini.
Ushirikiano huu wa kimkakati ni sehemu ya azma ya Rais Dkt. Samia Suluhu Hassan ya kuifungua Tanzania duniani na kuhakikisha kuwa rasilimali za nchi zinawanufaisha wananchi kupitia mifumo ya kisasa.
Kwa kuhusisha taasisi kama COSTECH, serikali inahakikisha kuwa teknolojia zinazoingia nchini zinashabihiana na mahitaji ya ndani na zinajenga uwezo wa wataalam wazalendo. Hii ni hatua madhubuti kuelekea uchumi jumuishi unaoendeshwa na maarifa na ubunifu wa kizazi cha sasa na kijacho.
SHY TALENT FILMS - CONTENT YA MWISHO DRAMA
🥃🍶 TUMIA VINYWAJI BORA VYA KAMPUNI YA EAST AFRICAN SPIRITS – BEI RAFIKI, LADHA SAFI BILA HARUFU MBAYA
Wasiliana nasi:
📍 East African Spirits (T) Ltd
📞 +255 767 650 806 | +255 652 096 254
Post a Comment