Mwenyekiti wa Taasisi ya Vyombo vya Habari Kusini mwa Afrika - Tawi la Tanzania (MISA Tanzania), Edwin Soko, amewahimiza waandishi wa habari kuendelea kutekeleza majukumu yao kwa weledi, kuzingatia maadili ya taaluma na kutumia nafasi zao kuibua fursa mbalimbali za maendeleo kwa jamii.

Soko ametoa rai hiyo leo Oktoba 12, 2026 jijini Mwanza wakati akifungua kongamano la MISA Tanzania lililowakutanisha wahariri, waandishi wa habari na wadau kutoka taasisi mbalimbali za Serikali na sekta binafsi, kwa lengo la kujenga mahusiano na kuimarisha ushirikiano kati ya tasnia ya habari na wadau hao.

Akizungumza katika kongamano hilo, Soko amesema MISA Tanzania inatambua umuhimu wa wadau kutoka sekta mbalimbali kutokana na mchango wao katika kuendeleza tasnia ya habari, akisisitiza umuhimu wa kuendelea kujenga mazingira ya ushirikiano wenye manufaa kwa pande zote.

Kongamano hilo limewakutanisha zaidi ya wanachama 60 wa MISA Tanzania kutoka Kanda ya Ziwa, Kanda ya Magharibi na Kanda ya Kati, pamoja na wadau kutoka taasisi mbalimbali zikiwemo Idara ya Uhamiaji, Benki Kuu ya Tanzania (BoT), Mfuko wa Taifa wa Bima ya Afya (NHIF), Mamlaka ya Usimamizi wa Bima Tanzania (TIRA) na Kampuni ya Bia Tanzania (TBL).

Kwa upande wake, Kaimu Katibu Tawala wa Mkoa wa Mwanza, Daniel Machunda, aliyewasilisha salamu kwa niaba ya mgeni rasmi, Mkuu wa Mkoa wa Mwanza ameipongeza MISA Tanzania kwa kuwakutanisha wadau hao na kusisitiza umuhimu wa waandishi wa habari kuendelea kubaini na kuibua fursa mbalimbali za maendeleo.

Machunda amesema ushirikiano kati ya waandishi wa habari na wadau wa maendeleo ni muhimu katika kuifikishia jamii taarifa zenye manufaa, kuongeza uelewa wa wananchi na kuibua fursa zinazoweza kuchangia maendeleo ya kiuchumi na kijamii.

Katika kongamano hilo, taasisi zilizoshiriki ziliwasilisha mada mbalimbali zilizolenga kuongeza uelewa wa waandishi wa habari kuhusu majukumu, huduma na shughuli zinazotekelezwa na taasisi hizo, pamoja na kuwajengea uwezo wa kupata na kutumia taarifa sahihi katika utekelezaji wa majukumu yao ya kitaaluma.

Baada ya uwasilishaji wa mada hizo, washiriki walipata fursa ya kuuliza maswali, kutoa maoni na kupata ufafanuzi kutoka kwa wawakilishi wa taasisi husika. Hatua hiyo ilifungua mjadala huru uliowawezesha waandishi wa habari na wadau kubadilishana mawazo, kufafanua hoja mbalimbali na kujadili namna ya kuimarisha mawasiliano na ushirikiano kati ya taasisi hizo na vyombo vya habari.

Mwenyekiti wa MISA Tanzania, Edwin Soko, akizungumza wakati wa kongamano la wadau, wahariri na waandishi wa habari lililofanyika jijini Mwanza.

Kaimu Katibu Tawala wa Mkoa wa Mwanza, Daniel Machunda, akiwasilisha salamu kwa niaba ya Mkuu wa Mkoa wakati wa kongamano la MISA Tanzania.

Baadhi ya viongozi wa MISA Tanzania, waandishi wa habari na wadau kutoka taasisi mbalimbali za Serikali na sekta binafsi wakiwa katika picha ya pamoja wakati wa kongamano la wadau lililofanyika jijini Mwanza, kwa lengo la kuimarisha ushirikiano na kubadilishana maarifa kati ya vyombo vya habari na taasisi hizo.