Waziri Mkuu Dkt. Mwigulu Nchemba akisisitiza kuwa Serikali itaendelea kushughulikia changamoto zinazowakabili wananchi katika maeneo mbalimbali nchini.

Na Mapuli Kitina Misalaba

Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba, ametoa maelekezo kwa viongozi na watendaji wa Serikali Nchini kuhakikisha changamoto zinazowakabili wananchi katika sekta mbalimbali zinashughulikiwa, akisisitiza kuwa Serikali ya Rais Dkt. Samia Suluhu Hassan itaendelea kutatua kero za wananchi na kuboresha huduma za kijamii na kiuchumi.

Dkt. Mwigulu ametoa maelekezo hayo leo Novemba 8, 2026, wakati akizungumza na maelfu ya wananchi katika mkutano wa hadhara uliofanyika Wilaya ya Kishapu mkoani Shinyanga, ikiwa ni sehemu ya ziara yake ya kikazi ya siku nne mkoani humo.

Katika mkutano huo, Waziri Mkuu ametangaza kuwa kuanzia msimu ujao wa ununuzi wa pamba, Serikali itaondoa mfumo wa kuwa na mnunuzi mmoja, akieleza kuwa hatua hiyo inalenga kushughulikia changamoto zinazojitokeza katika ununuzi wa zao hilo na kuboresha mazingira ya wakulima.

Akizungumzia sekta ya afya, Dkt. Mwigulu ameeleza kutoridhishwa na taarifa za baadhi ya vituo vya afya, zahanati na hospitali Nchini kuripoti kupokea dawa kutoka Serikalini, lakini wagonjwa wanapofika kuhitaji dawa hizo huambiwa hazipo na kuelekezwa kuzinunua katika maduka ya dawa.

Amehoji chanzo cha upatikanaji wa dawa hizo katika maduka ya nje ya vituo vya kutolea huduma za afya wakati wagonjwa wakielezwa kuwa hazipatikani katika vituo vya Serikali, huku akivielekeza vyombo vya dola kufuatilia taarifa hizo ili kubaini ukweli na kuchukua hatua stahiki.

Aidha, amepiga marufuku utaratibu wa kuwachelewesha wagonjwa mahututi na wajawazito wanaofika hospitalini wakiwa katika hali inayohitaji huduma ya haraka kwa sababu ya taratibu za usajili, akielekeza wagonjwa hao wapatiwe matibabu kwanza na taratibu za kiutawala zifuatwe baadaye.

Katika hatua nyingine, Waziri Mkuu amewataka watumishi wa umma, wakiwemo madaktari, kuacha kutumia muda wa kazi kuchati na kufanya shughuli zisizohusiana na majukumu yao, akisisitiza umuhimu wa kuwahudumia wananchi wanaofika katika ofisi za Serikali kutafuta huduma.

Amesema si sahihi kwa mtumishi wa umma kukataa kumsikiliza mwananchi anayefika ofisini kwa kisingizio kwamba hana miadi maalumu (appointment), ilhali mwananchi huyo ametumia muda na gharama kufika kupata huduma.

“Nimepata nafasi ya kufanya kazi na Rais Samia, ameshatimiza wajibu wake. Sisi wengine Watanzania, hasa tunaomsaidia huku chini, tunatakiwa tutimize wajibu wetu,” amesema Dkt. Mwigulu.

Kuhusu changamoto zinazowakabili waendesha vyombo vya usafiri wa kibiashara wakiwemo bodaboda na bajaji nchini, Waziri Mkuu amesema Serikali inatambua umuhimu wa vyombo hivyo katika kuwaingizia kipato wananchi, hivyo ameelekeza kuwepo kwa utaratibu utakaowawezesha wanaokosea kulipa faini bila kunyang'anywa vyombo vyao vya usafiri.

Ameeleza kuwa baadhi ya waendesha bodaboda na bajaji wanatumia vyombo vilivyonunuliwa kwa mikopo, hivyo kuvichukua na kuvihifadhi hadi wahusika watakapolipa faini kunawaongezea ugumu wa kupata kipato cha kulipa adhabu hizo.

Katika sekta ya ujenzi, Dkt. Mwigulu amesema Serikali imefuta kodi za uingizaji saruji kutoka nje ya nchi pamoja na malighafi zinazotumika katika uzalishaji wa saruji, hatua ambayo amesema inalenga kupunguza gharama za uzalishaji na kuifanya bidhaa hiyo kupatikana kwa bei nafuu zaidi.

Amesema hatua hiyo inatarajiwa kuchangia kushuka kwa bei ya saruji katika siku zijazo, jambo litakalosaidia wananchi wanaojenga na kuendeleza shughuli mbalimbali za ujenzi.

Aidha, ameelekeza changamoto za miundombinu ya barabara na upatikanaji wa maji katika Wilaya ya Kishapu na Mkoa wa Shinyanga kwa ujumla kushughulikiwa ili kuboresha huduma na kuchochea shughuli za kiuchumi kwa wananchi.

Kwa upande wake, Mkuu wa Mkoa wa Shinyanga, Mhe. Mboni Mhita, amemshukuru Waziri Mkuu kwa kutembelea mkoa huo na kupata fursa ya kuzungumza moja kwa moja na wananchi, akieleza kuwa ziara hiyo ni muhimu katika kuimarisha mawasiliano kati ya Serikali na wananchi.

Katika taarifa yake Mhe. Mhita amesema Mkoa wa Shinyanga unaendelea kusimamia utekelezaji wa miradi ya maendeleo na kuboresha utoaji wa huduma za kijamii, huku akibainisha kuwa ushirikiano kati ya Serikali Kuu, viongozi wa mkoa, wilaya na Halmashauri ni muhimu katika kufanikisha malengo ya maendeleo.

Ameeleza kuwa maelekezo yaliyotolewa na Waziri Mkuu yatakuwa mwongozo kwa viongozi na watendaji katika maeneo yao ya kazi, hususan katika kushughulikia kero za wananchi na kuhakikisha changamoto zinazowasilishwa zinapatiwa ufumbuzi.

Mkutano huo umehudhuriwa na viongozi mbalimbali wa Serikali, akiwemo Waziri wa Mambo ya Ndani ya Nchi Patrobas Katambi, Waziri wa Ujenzi Masanja Kungu Kadogosa, Naibu Waziri wa Nishati Salome Makamba, Naibu Waziri wa Nchi, Ofisi ya Rais – TAMISEMI Dkt. Jafar Seif na Naibu Waziri wa Maji Mhandisi Kundo Andrea Mathew.

Wengine waliohudhuria ni Mbunge wa Jimbo la Kishapu Mhe. Lucy Mayenga, Mkuu wa Wilaya ya Kishapu Peter Nicholaus Masindi, Mkuu wa Wilaya ya Kahama Dkt. Francis Daud Mlacha, pamoja na Mkuu wa Wilaya ya Shinyanga Wakili Julius Mtatiro.

Maelfu ya wananchi, wakiwemo viongozi wa dini, viongozi wa kimila na wawakilishi wa taasisi za umma na binafsi kutoka ngazi za mkoa, wilaya na kata, wamehudhuria mkutano huo.

Katika mkutano huo, Waziri Mkuu pia amepata fursa ya kusikiliza kero na changamoto zilizowasilishwa na wananchi na kutoa maelekezo ya kuzishughulikia mbele ya wananchi hao.

Ziara ya Waziri Mkuu inaendelea kesho Novemba 9, 2026, ambapo atatembelea na kufanya mikutano ya hadhara katika Jimbo la Solwa ambapo ni Halmashauri ya Wilaya ya Shinyanga, pamoja na Jimbo la Shinyanga Mjini ndani ya katika Halmashauri ya Manispaa ya Shinyanga.