Mamlaka ya Chakula na Dawa ya Marekani (FDA) imeruhusu matumizi ya sindano mpya inayojulikana kama Lenacapavir – maarufu kwa jina la biashara Yeztugo. Dawa hii iliyobuniwa na kampuni ya Gilead Sciences inalenga kuzuia maambukizi ya VVU kwa watu ambao hawajaambukizwa lakini wako katika hatari kubwa, kwa kuchomwa sindano mara mbili tu kwa mwaka.
Tokea kuanza kutumika kwa dawa za kinga dhidi ya maambukizi (PrEP) zaidi ya muongo mmoja uliopita, watu wengi walilazimika kutumia vidonge kila siku – hali ambayo si wote walioweza kuifuata kwa ufanisi. Lenacapavir inabadilisha kabisa hali hiyo kwa kutoa kinga ya miezi sita kutokana na uwezo wake wa kubaki mwilini kwa muda mrefu na kuzuia virusi kuingia na kuenea ndani ya seli za mwili.
Takwimu kutoka kwenye tafiti za Gilead zinaonesha kuwa Lenacapavir inapunguza hatari ya kuambukizwa kwa zaidi ya asilimia 99.9 ikiwa itatumika kama ilivyopendekezwa. Hii ni habari njema sio tu kwa watoa huduma za afya, bali pia kwa jamii ambazo zimekuwa zikikabiliwa na changamoto za upatikanaji wa huduma endelevu za kinga dhidi ya VVU.
Akizungumzia mafanikio haya, Mkurugenzi Mtendaji wa Gilead Sciences, Daniel O’Day, alisema: “Tunafungua ukurasa mpya wa matumaini. Kwa mara ya kwanza, tunaweza kuwapa watu kinga dhidi ya VVU kwa njia rahisi, salama na yenye ufanisi mkubwa. Hii ni hatua kubwa kuelekea kizazi kisichoambukizwa kabisa.”
Tangazo hili limepokelewa kwa shangwe na matumaini makubwa katika sekta ya afya ya umma, hususan mashirika yanayojihusisha na vita dhidi ya UKIMWI. Kwa muda mrefu, ukosefu wa uaminifu katika matumizi ya vidonge vya kila siku ulikuwa kikwazo kikubwa – jambo ambalo sasa linaweza kupungua kwa uwepo wa sindano ya mara mbili kwa mwaka.
Watalaamu wa afya wanaamini kuwa teknolojia hii ya matibabu inaweza kubadili kabisa mwelekeo wa janga la UKIMWI duniani, hasa katika maeneo ambayo miundombinu ya afya ni dhaifu au huduma ni nadra.
Pamoja na matarajio makubwa, changamoto ya usambazaji wa dawa hii kwa mataifa yanayoendelea bado ni suala linalozua mjadala. Gharama halisi ya Lenacapavir bado haijawekwa wazi, jambo linalotia wasiwasi kuhusu upatikanaji wake kwa watu wa kawaida, hususan katika nchi za Afrika zilizoathirika zaidi na VVU.
Wataalamu wanasisitiza kuwa usawa wa upatikanaji utategemea ushirikiano kati ya serikali, mashirika ya kimataifa, na kampuni ya Gilead kuhakikisha hakuna anayebaki nyuma kwa sababu ya uwezo mdogo wa kifedha.
Ingawa Lenacapavir si chanjo katika maana ya kitaalamu, watafiti wanaiita “chanjo ya kisasa” kwa sababu ya uwezo wake mkubwa wa kuzuia maambukizi na muda wa kinga unaodumu hadi miezi sita. Kwa sasa, hakuna chanjo rasmi dhidi ya VVU iliyoidhinishwa, lakini sindano hii inaleta matumaini ya dhati kwa dunia nzima.
Kwa mara ya kwanza, dunia inashuhudia uvumbuzi wa dawa ya kuzuia VVU inayoweza kubadilisha maisha kwa njia rahisi na ya kudumu. Ikiwa itapatikana kwa usawa, Lenacapavir inaweza kuwa silaha muhimu katika kufikia lengo la kutokomeza UKIMWI ifikapo 2030.
Why Are Some Tanzanians Putting Eggs Under Their Beds? Doctors React
bio-nutrabalance.com
by TaboolaSponsored Links
Katika kipindi hiki ambapo afya ya jamii inazidi kupewa kipaumbele, sindano hii mpya inaweza kuwa nyenzo yenye nguvu zaidi kuwahi kutokea katika historia ya mapambano dhidi ya UKIMWI.
Je, dunia itaweza kuitumia kikamilifu kabla haijachelewa?
Post a Comment