Wakati Serikali ikizidisha kasi ya kuwezesha wananchi kiuchumi kupitia sekta ya kilimo na ujasiriamali, wadau wa maendeleo na wajasiriamali nchini wametoa wito wa kudumisha amani na kufuata taratibu za kisheria katika kutatua migogoro, wakisisitiza kuwa vurugu na jazba ni maadui wa maendeleo ya mwananchi mnyonge.
Mwanahabari Idrisa Magomeni, akizungumza jijini Dar es Salaam, amewaalika Watanzania kutumia subira na mazungumzo kama njia ya kupata ufumbuzi wa changamoto zao. Magomeni amekumbusha kuwa hata uhuru wa Tanzania haukuletwa kwa siku moja wala kwa vurugu, bali kwa mazungumzo ya hekima yaliyofanywa na waasisi wa taifa.
“Jazba na kebehi hayawezi kuwa suluhisho. Ukiwa na shida, lisemee kwa njia nzuri na kufuata taratibu zilizowekwa. Tukiharibu amani, hata huduma za msingi kama maji na miundombinu tunayopigia kelele leo, itakuwa vigumu kuipata,” alisema Magomeni.
Kauli hiyo imeungwa mkono na baadhi ya wajasiriamali kutoka maeneo ya Kimara, Kariakoo na Gongo la Mboto, ambao wamelaani vikali matukio ya vurugu yaliyotokea Oktoba 29.
Wamebainisha kuwa ghasia hizo hazikuleta mabadiliko chanya, bali zilivunja miundombinu ya biashara na kusababisha hasara kwa walipakodi na wauza mitumba, nyanya na vitumbua.
Mjasiriamali Bakari Sufiani amesisitiza: “Ukiharibu miundombinu, humkomoi kiongozi yeyote, bali unaua biashara zetu sisi wananchi wa kawaida. Siasa yetu ni biashara zetu, na tuko tayari kuhubiri amani nchi nzima.”
Umuhimu wa amani unaonekana wazi katika miradi ya kimkakati ya serikali, kama ule wa ugawaji wa miche ya kahawa bure unaoendelea mkoani Ruvuma kupitia MBiFACU.
Imeelezwa kuwa, bila utawala wa sheria na utulivu, serikali isingeweza kutumia rasilimali zake kugawa miche bora na kutoa ruzuku kwa wakulima, jambo ambalo limeongeza mauzo ya nje hadi kufikia dola milioni 230.
Kudumisha amani si tu suala la kiusalama, bali ni suala la kiuchumi. Wananchi wanahimizwa kuachana na siasa za chuki na badala yake kutumia mifumo ya kisheria na kikatiba iliyopo kudai haki zao. Huu ndio msimamo utakaohakikisha kuwa ajira za vijana zinastawi na mipango ya serikali ya muda mrefu inaleta tija bila kuingiliwa na uharibifu wa mali na chuki za kijamii.
🥃🍶 TUMIA VINYWAJI BORA VYA EAST AFRICAN SPIRITS – BEI RAFIKI, LADHA SAFI BILA HARUFU MBAYA
Wasiliana nasi:
📍 East African Spirits (T) Ltd
📞 +255 767 650 806 | +255 652 096 254
Post a Comment