Na Gabon Mariba-Mara.
Benki ya CRDB imekabidhi jumla ya madawati 40 kwa wanafunzi wa Shule ya Msingi Nyabisare iliyopo Manispaa ya Musoma mkoani Mara, ikiwa ni sehemu ya utekelezaji wa mpango wake wa Keti Jifunze unaolenga kuboresha mazingira ya kujifunzia kwa wanafunzi nchini. Makabidhiano hayo yamefanyika huku wadau mbalimbali wakiendelea kushirikiana na Serikali katika kukabiliana na changamoto zinazoikabili sekta ya elimu.
Akizungumza katika hafla hiyo, mwakilishi wa Benki ya CRDB amesema benki hiyo inatambua umuhimu wa elimu katika kujenga jamii yenye maarifa na kuandaa kizazi kitakachokuwa na mchango katika maendeleo ya taifa. Amesema ongezeko la idadi ya watoto nchini linaongeza hitaji la uwepo wa miundombinu na vifaa vya kutosha vya kujifunzia, huku CRDB ikiendelea kuunga mkono juhudi za Serikali kupitia miradi mbalimbali ya kijamii katika sekta ya elimu, afya na mazingira.
Amesema kupitia mpango wa Keti Jifunze, Benki ya CRDB imekuwa ikishirikiana na Halmashauri mbalimbali nchini kugawa madawati kwa shule zenye uhitaji, hatua inayolenga kuwawezesha wanafunzi kusoma katika mazingira rafiki na kuwapa walimu mazingira bora ya kufundishia. Kwa mwaka 2026, Shule ya Msingi Nyabisare imekuwa shule ya kwanza wilayani Musoma na miongoni mwa shule za Mkoa wa Mara kunufaika na mpango huo, huku Halmashauri za Bunda Mjini, Mugumu Serengeti na Tarime Mjini zikitajwa pia kuwa miongoni mwa maeneo yatakayonufaika.
Kwa upande wake, Mkuu wa Wilaya ya Musoma, Juma Chikoka, ameishukuru Benki ya CRDB kwa msaada huo, akisema madawati hayo yatasaidia kupunguza changamoto ya uhaba wa madawati na kuboresha mazingira ya wanafunzi kusoma katika Shule ya Msingi Nyabisare. Chikoka ametoa rai kwa uongozi wa shule, walimu, wanafunzi na wananchi kuhakikisha madawati hayo yanatunzwa vizuri ili yadumu na kuendelea kuwanufaisha wanafunzi wa sasa pamoja na vizazi vijavyo.
Chikoka pia amewataka wadau wengine kuendelea kushirikiana na Serikali katika kubaini na kutatua changamoto zinazoikabili sekta ya elimu, akisisitiza kuwa elimu bora inahitaji mazingira bora ya kujifunzia. Amesema ushirikiano kati ya Serikali, taasisi binafsi na jamii ni muhimu katika kuhakikisha watoto wanapata fursa ya kusoma, kujifunza kwa utulivu na hatimaye kutimiza ndoto zao.
Naye Diwani wa Kata ya Bweri ameishukuru Benki ya CRDB kwa kuifikia jamii kupitia mpango wa Keti Jifunze, akisema msaada huo ni sehemu muhimu ya juhudi za kuboresha elimu katika eneo hilo. Diwani huyo ameahidi kuendelea kushirikiana na Serikali, uongozi wa shule na wadau mbalimbali wa elimu katika kuhakikisha changamoto zinazojitokeza zinapatiwa ufumbuzi, huku akiwataka wananchi kushiriki kikamilifu katika kulinda miundombinu na vifaa vya shule.
Benki ya CRDB imesema itaendelea kushirikiana na Serikali na Halmashauri mbalimbali katika kuboresha mazingira ya elimu, huku ikieleza kuwa bado kuna mahitaji katika shule nyingine ndani ya Wilaya ya Musoma, Mkoa wa Mara na maeneo mengine nchini. Kwa hatua hii, madawati 40 yaliyokabidhiwa Shule ya Msingi Nyabisare yanatarajiwa kupunguza changamoto ya wanafunzi kukosa sehemu bora za kukalia wakati wa masomo na kuimarisha mazingira ya kujifunzia.
Post a Comment