Mrakibu Mwandamizi wa Uhamiaji, Azizi Kirondomara, akizungumza wakati wa kongamano la MISA Tanzania lililowakutanisha wanachama wa taasisi hiyo na wadau mbalimbali jijini Mwanza.

Mrakibu Mwandamizi wa Uhamiaji, Azizi Kirondomara, amewataka Watanzania kuwa na utaratibu wa kuomba pasipoti za kusafiria mapema badala ya kusubiri hadi wanapopata safari za kwenda nje ya nchi, ili kujiandaa kwa wakati na kuepuka usumbufu unaoweza kujitokeza wakati wa maandalizi ya safari.

Kirondomara ametoa wito huo wakati wa kongamano la MISA Tanzania lililowakutanisha wanachama wa taasisi hiyo pamoja na wadau kutoka taasisi mbalimbali za Serikali na sekta binafsi jijini Mwanza, akisisitiza umuhimu wa Watanzania kuzingatia maandalizi ya mapema kwa safari za kimataifa.

Aidha, amewashauri Watanzania ambao tayari wana pasipoti kuhakikisha wanazitunza kwa usalama na kuepuka kutembea nazo bila sababu za msingi, akieleza kuwa baadhi ya watu wamekuwa wakipoteza nyaraka hizo wanapokuwa wanazibeba bila kuwa na safari inayohitaji matumizi yake.

Amesisitiza kuwa pasipoti ni nyaraka muhimu kwa Watanzania wanaohitaji kusafiri nje ya nchi, hivyo ni muhimu kuzihifadhi vizuri na kufuata taratibu za Idara ya Uhamiaji ili kuhakikisha zinakuwa salama na zinapatikana pale zinapohitajika.

Kwa upande wake, Mwenyekiti wa MISA Tanzania, Edwin Soko, ameeleza umuhimu wa kuwashirikisha wadau kutoka taasisi mbalimbali katika shughuli za wanahabari, akibainisha kuwa ushirikiano huo unasaidia kuongeza uelewa wa masuala yanayohusu huduma na majukumu ya taasisi hizo nchini.

Mrakibu Mwandamizi wa Uhamiaji, Azizi Kirondomara, akiwasilisha taarifa kuhusu huduma na majukumu ya Idara ya Uhamiaji wakati wa kongamano la MISA Tanzania jijini Mwanza.