Na Mapuli Kitina Misalaba

Waziri Mkuu wa Jamhuri ya Muungano wa Tanzania, Dkt. Mwigulu Nchemba, ameitaka Wakala wa Barabara Tanzania (TANROADS) kuharakisha usanifu wa kina wa barabara inayounganisha Halmashauri ya Ushetu na Kahama ili iweze kuingizwa katika mipango ya bajeti ya mwaka ujao wa fedha.

Maelekezo hayo yametolewa Novemba 11, 2026, wakati Waziri Mkuu akizungumza na wananchi katika mkutano wa hadhara uliofanyika Viwanja vya Stendi ya Nyamilangano, Halmashauri ya Ushetu, mkoani Shinyanga, baada ya Mbunge wa Jimbo la Ushetu Mhe. Emmanuel Peter Cherehani, kuwasilisha changamoto ya barabara hiyo na kuomba ijengwe kwa kiwango cha lami.

Akitoa ufafanuzi, Meneja wa TANROADS Mkoa wa Shinyanga, Ntuli Mwaikokesye, amesema usanifu wa kina wa barabara hiyo unatarajiwa kukamilika ndani ya miezi minne.

Hata hivyo, Dkt. Mwigulu amemtaka meneja huyo kuongeza kasi ya kazi kwa kufanya kazi usiku na mchana ili kupunguza muda wa kukamilisha usanifu huo na kuiwezesha Serikali kuzingatia mradi huo katika maandalizi ya bajeti ijayo.

Katika hoja nyingine, Mbunge Cherehani amewasilisha changamoto ya gharama za tozo na riba zinazohusiana na upatikanaji wa pembejeo za kilimo, hususan kwa wakulima wa tumbaku, akieleza namna gharama hizo zinavyoongeza mzigo kwa wakulima.

Akijibu hoja hiyo, Waziri Mkuu amewaelekeza Mawaziri wenye dhamana ya TAMISEMI, Fedha na Kilimo kukaa pamoja na kupitia upya muundo wa tozo hizo ili kubaini namna ya kupunguza gharama zinazowakabili wakulima. Amesema atashirikiana na mawaziri hao pamoja na wabunge wa maeneo yanayokabiliwa na changamoto hiyo kutafuta ufumbuzi.

Kuhusu changamoto ya kukatika kwa umeme, Dkt. Mwigulu amesema hali hiyo inahusishwa na ongezeko la matumizi ya umeme kufuatia upanuzi wa huduma katika maeneo mengi, ambao umeongeza mahitaji kwenye miundombinu ya gridi ya taifa.

Ametoa mfano wa huduma ya umeme iliyokuwa imepangwa kufika Kahama lakini sasa imeendelea kusambazwa hadi maeneo ya vijijini, hali inayoongeza mahitaji ya umeme katika mfumo wa usambazaji.

Waziri Mkuu amesema Serikali inaendelea kutekeleza Mradi wa Gridi Imara wenye thamani ya zaidi ya Shilingi trilioni 1.1, ambao unalenga kuimarisha uwezo wa kusafirisha na kusambaza umeme ili kukidhi ongezeko la mahitaji nchini.

Aidha, ameelekeza Shirika la Umeme Tanzania (TANESCO) kuendelea kuwaunganishia umeme wananchi wanaostahili gharama ya Shilingi 27,000, akisisitiza kuwa hadhi ya kiutawala ya eneo isiwe sababu ya kuwatoza wananchi gharama kubwa wakati mazingira yao bado yanafanana na vijijini.

Katika ziara hiyo, Dkt. Mwigulu amesisitiza pia umuhimu wa kusimamia thamani ya fedha zinazotolewa na Serikali kwa ajili ya utekelezaji wa miradi ya maendeleo, akieleza kuwa fedha hizo zinapaswa kutumika kwa malengo yaliyokusudiwa na miradi ikamilishwe kwa ubora unaotakiwa.

Mkutano huo umetoa nafasi kwa wananchi wa Ushetu kuwasilisha changamoto zao moja kwa moja kwa Waziri Mkuu, huku viongozi na watendaji wa Serikali wakipata maelekezo ya kushughulikia hoja zilizowasilishwa.

Waziri Mkuu wa Jamhuri ya Muungano wa Tanzania, Dkt. Mwigulu Nchemba, akizungumza na wananchi wa Halmashauri ya Ushetu wakati wa mkutano wa hadhara uliofanyika Novemba 11, 2026, ambapo alisikiliza kero mbalimbali na kutoa maelekezo ya kuzitatua.

Mkuu wa Mkoa wa Shinyanga, Mboni Mhita, akizungumza katika mkutano wa hadhara wa Waziri Mkuu Dkt. Mwigulu Nchemba na wananchi wa Halmashauri ya Ushetu.

Mbunge wa Jimbo la Ushetu, Emmanuel Peter Cherehani, akiwasilisha changamoto za wananchi wa jimbo hilo mbele ya Waziri Mkuu Dkt. Mwigulu Nchemba, ikiwemo ujenzi wa barabara ya Ushetu–Kahama kwa kiwango cha lami.