Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba, ameelekeza kuwasilishwa kwa maombi ya ujenzi wa vituo viwili vya afya katika Jimbo la Itwangi, Halmashauri ya Wilaya ya Shinyanga, pamoja na hatua za kuajiri walimu wawili waliojitolea katika Shule ya Msingi Masunula baada ya shule hiyo kufanya vizuri katika matokeo ya kitaifa.

Maelekezo hayo ameyatoa leo Novemba 10, 2026, wakati akizungumza na wananchi katika mkutano wa hadhara uliofanyika Kijiji cha Singita, Kata ya Usanda, Jimbo la Itwangi, ikiwa ni sehemu ya ziara yake ya kikazi mkoani Shinyanga.

Mbunge wa Jimbo la Itwangi, Azza Hillal Hamad, aliwasilisha hoja mbalimbali zinazohusu mahitaji ya wananchi wa jimbo hilo, ikiwemo uhitaji wa vituo viwili vya afya katika Kata za Usule na Didia, pamoja na changamoto ya kutokukamilika kwa jengo la Zahanati ya Mwamkanga.

Katika hoja zake, Mbunge huyo pia alieleza umuhimu wa walimu wawili wa kujitolea wa Shule ya Msingi Masunula kupata ajira serikalini, akizingatia mchango wao katika shule hiyo iliyofanya vizuri na kushika nafasi ya pili kitaifa.

Dkt. Mwigulu amemtaka Katibu Tawala wa Mkoa wa Shinyanga kuandaa na kuwasilisha maombi ya ujenzi wa vituo viwili vya afya katika Kata za Usule na Didia ili kusaidia kuboresha upatikanaji wa huduma za afya kwa wananchi wa maeneo hayo.

Aidha, Waziri Mkuu ametumia nafasi hiyo kutoa ahadi ya kutafuta Shilingi milioni 76 kwa ajili ya kukamilisha jengo la Zahanati ya Mwamkanga, ili wananchi wa eneo hilo waanze kupata huduma za afya karibu na maeneo yao.

Katika sekta ya elimu, Dkt. Mwigulu ameelekeza walimu wawili wa kujitolea waliokuwa wakifundisha katika Shule ya Msingi Masunula waajiriwe na Serikali kutokana na mchango wao katika kuifanya shule hiyo kufanya vizuri na kushika nafasi ya pili kitaifa.

Amesema hatua hiyo inalenga kutambua mchango wa walimu hao ambao wamekuwa wakijitolea kwa zaidi ya miaka mitano, licha ya changamoto ya upungufu wa walimu shuleni hapo.

Katika hatua nyingine, Waziri Mkuu amepokea ombi la wananchi wa Jimbo la Itwangi la kutaka eneo hilo kuwa na Halmashauri inayojitegemea, tofauti na hali ya sasa ambapo linaendelea kuwa sehemu ya Halmashauri ya Wilaya ya Shinyanga.

Akijibu ombi hilo, Dkt. Mwigulu amesema Serikali imelipokea na kuelekeza viongozi na watendaji kuanza kukamilisha huduma na miundombinu ya msingi inayohitajika ili eneo hilo liweze kufikia vigezo vya kuanzishwa kwa Halmashauri yake.

Kwa upande wake, Mkuu wa Mkoa wa Shinyanga, Mhe. Mboni Mhita, amesema mkoa huo umepokea jumla ya Shilingi trilioni 2.2 kwa ajili ya utekelezaji wa miradi mbalimbali ya maendeleo katika kipindi cha Serikali ya Awamu ya Sita chini ya uongozi wa Rais Dkt. Samia Suluhu Hassan.

Amesema fedha hizo zimeelekezwa katika sekta mbalimbali zikiwemo afya, elimu, maji, barabara, nishati na miundombinu mingine ya kijamii na kiuchumi, hatua inayolenga kuboresha huduma kwa wananchi na kuchochea maendeleo ya mkoa huo.

Mkutano huo pia umehudhuriwa na Naibu Waziri wa Maji, Mhe. Mhandisi Andrea Mathew Kundo, pamoja na Naibu Waziri wa Nchi, Ofisi ya Rais – Tawala za Mikoa na Serikali za Mitaa (TAMISEMI), Dkt. Jafar R. Seif, ambao wameshiriki katika shughuli za mkutano huo pamoja na viongozi wengine wa Serikali.

Ziara ya Waziri Mkuu Dkt. Mwigulu Nchemba mkoani Shinyanga inaendelea, ambapo kesho atafanya mikutano ya hadhara katika Halmashauri ya Ushetu Pamoja na Msalala.