MBUNGE WA JIMBO LA SHINYANGA MJINI PASCHAL PATROBAS KATAMBI AKABIDHI ZAIDI YA BAISKELI 480 KWA VIONGOZI MBALIMBALI NA MASHINE 10 ZA KUTOTOLESHA KUKU KWA UWT SHINYANGA

Baba Mtakatifu Farancisco, amemteua Askofu Mkuu PROTACE RUGAMBWA, kuwa Askofu Mkuu mrithi wa Jimbo kuu la Tabora.

Kwa mujibu wa taarifa iliyotolewa na Katibu Mkuu wa Baraza la Maaskofu Katoliki Tanzania (TEC) Padre Charles Kitima, uteuzi huo umefanyika leo tarehe 13.04.2023.

Kabla ya uteuzi huo, Askofu Mkuu Rugambwa alikuwa katibu Mkuu wa Idara ya Uinjilishaji wa watu mjini Vatican.

Askofu mkuu Protas Rugambwa, alizaliwa mnamo Mei 31 mwaka 1960, huko Bunena, Jimbo Katoliki la Bukoba. Baada ya kumaliza elimu yake ya Msingi alijiunga na elimu ya Sekondari katika Seminari ndogo za Katoke Rulenge na Itaga Tabora kwa masomo ya kidato cha kwanza hadi cha sita.Alijiunga na masomo ya Falsafa katika Seminari kuu ya Kibosho iliyoko Jimbo Katoliki la Moshi na akaendeleo na Masomo ya Thelojia katika Seminari kuu ya Mtakatifu Karoli Lwanga Segerea, iliyopo Jimbo kuu la Dar es salaam.

Baada ya masomo na majiundo yake ya Kipadre, alipewa daraja takatifu la upadre mnamo Septemba 2 mwaka 1990, katika Jimbo kuu la Dar es Salaam, wakati wa Hija ya Kichungaji ya Baba Mtakatifu Yohane Paulo wa Pili nchini Tanzania akiwa ni Padre kutoka Jimbo la Rulenge-Ngara.

Baada ya Upadrisho alifanya utume katika Parokia mbalimbali za Jimbo la Rulenge-Ngara, Seminari Ndogo ya Katoke, ikiwa ni pamoja na Mwenyekiti wa Idara la Liturjia wa Jimbo Katoliki Rulenge na Mhudumu wa shughuli za kiroho katika Hospitali ya Biharamulo.

Kuanzia mwaka 1994 hadi 1999 alipelekwa mjini Roma kwa masomo ya juu katika Chuo Kikuu cha Kipapa cha Laterano na kujipatia Shahada ya Uzalimivu katika shughuli za kichungaji ambapo baada ya kurudi Jimboni, alipangiwa majukumu mbalimbali ikiwemo Mwalimu na Mkurugenzi wa miito wa jimbo, Mkurugenzi wa shughuli za Kichungaji na Makamu Askofu.

Mnamo mwaka 2002 hadi 2008, aliombwa kwenda kusaidia kutoa huduma za kichungaji kwenye Baraza la Kipapa la Uinjilishaji wa Watu, utume ambao aliufanya kwa ufanisi mkubwa ambapo tarehe 18 Januari 2008, Baba Mtakatifu Benedikto wa kumi na sita, akamteua kuwa ni Askofu wa Jimbo Katoliki Kigoma, na kuwekwa wakfu tarehe 13 Aprili 2008.

Aidha,mnamo Juni 16 mwaka 2012, Baba Mtakatifu Benedict wa 16 alimteua kuwa Katibu mkuu msaidizi wa Baraza la Kipapa la Uinjilishaji wa watu na Rais wa Mashirika ya Kimissionari ya Kipapa mjini VATICAN ambapo amehudumu mpaka alipoteuliwa kuwa Askofu Mkuu mrithi wa Jimbo kuu Tabora.