Askofu wa Kanisa Katoliki Jimbo la Shinyanga Mhashamu Liberatus Sangu, kesho Jumatano tarehe 14.02.2024, ataongoza Misa ya Jumatano ya majivu katika Kanisa kuu la Mama mwenye huruma Ngokolo mjini Shinyanga.
Kwa mujibu wa Katibu wa Askofu Padre Paul Mahona, Misa hiyo itaanza saa 10:00 Jioni na itahudhuriwa na waamini kutoka sehemu mbalimbali za Parokia ya Ngokolo.
Kabla ya kuadhimisha Misa ya Jumatano ya Majivu hapo kesho, Jana Jumatatu Askofu Sangu alitumia mapumziko yake kwa kuwatembelea wazee wasiojiweza wanaolelewa katika kituo Cha Busanda katika Halmashauri ya Wilaya ya Shinyanga vijijini, ambapo pamoja na mambo mengine alifanya matendo ya huruma kwa kuwapa misaada mbalimbali ya kiutu, kuwatia Moyo, kuwafariji, kula nao pamoja na kuongea nao.
Misa ya Jumatano ya majivu ambayo huadhimishwa kila mwaka na Kanisa Katoliki duniani ni sehemu ya mwanzo wa kuingia kwenye kipindi cha Kwaresma, ambapo wakristo hufunga na kufanya toba ya kina kwa siku arobaini kabla ya kusherekea sikukuu ya Pasaka.
Katika kipindi hicho, Wakristo hutakiwa kufunga, kujiweka karibu zaidi na Mungu kwa kufanya toba na kuwasaidia masikini kile wanachojinyima kupitia kufunga kwao.
Post a Comment