Mamlaka ya Udhibiti wa Huduma za Nishati na Maji (EWURA) imetangaza bei kikomo mpya za rejareja na jumla kwa bidhaa za mafuta ya petroli zitakazotumika nchini kuanzia Jumatano tarehe 1 Oktoba 2025 saa 6:01 usiku. Bei hizi mpya zitahusu mikoa inayopokea mafuta kupitia bandari za Dar es Salaam, Tanga na Mtwara, kwa mujibu wa Jedwali Na. 1 na Na. 2 lililotolewa na EWURA.
Kwa mujibu wa tangazo hilo, bei kikomo za rejareja kwa petroli katika Dar es Salaam ni shilingi 2,752 kwa lita, dizeli shilingi 2,704 kwa lita na mafuta ya taa shilingi 2,774 kwa lita. Katika Bandari ya Tanga bei ya petroli ni shilingi 2,813, dizeli shilingi 2,766 na mafuta ya taa shilingi 2,835 kwa lita. Wakati huo huo, katika Bandari ya Mtwara bei za petroli zimepangwa shilingi 2,844 kwa lita, dizeli shilingi 2,797 na mafuta ya taa shilingi 2,866 kwa lita.
Aidha, EWURA imetoa maelezo kuhusu mwenendo wa bei za mafuta katika soko la dunia ambapo imeelezwa kuwa kwa mwezi Oktoba 2025, bei ya mafuta ghafi ya petroli imepanda kwa asilimia 2.80, dizeli kwa asilimia 3.65 na mafuta ya taa kwa asilimia 3.57. Hata hivyo, gharama za kuagiza mafuta (premiums) zimepungua katika Bandari ya Dar es Salaam na Mtwara, huku Tanga ikishuhudia ongezeko dogo kwa mafuta ya petroli na dizeli.
Pia, EWURA imesisitiza kuwa wafanyabiashara wote wanatakiwa kufuata bei hizi kikomo za rejareja na jumla. Hatua kali za kisheria zitachukuliwa dhidi ya mfanyabiashara yeyote atakayekiuka agizo hilo, ikiwemo kuuza mafuta kwa bei zinazozidi kiwango kilichopangwa. EWURA pia imewakumbusha wafanyabiashara kutoa stakabadhi za mauzo kupitia mashine za kielektroniki (EFD) ili kuhakikisha uwazi wa biashara na ukusanyaji wa kodi za serikali.
Vilevile, EWURA imetoa wito kwa wananchi kutumia huduma ya simu ya mkononi 15200# kupata taarifa sahihi kuhusu bei za mafuta katika maeneo yao. Kwa mujibu wa Sheria ya Mafuta ya mwaka 2015, bei za mafuta zitaendelea kupangwa na EWURA ili kulinda maslahi ya wananchi na kuzuia upandaji holela wa bei unaoweza kuathiri uchumi wa taifa.
Kwa ujumla, tangazo hili linaonesha jitihada za serikali kupitia EWURA kuhakikisha upatikanaji wa mafuta kwa bei nafuu na kudhibiti mfumuko wa bei, huku ikihakikisha uwazi na uadilifu katika biashara ya nishati nchini.
Post a Comment