Na Mwandishi wetu
Tunapoelekea Uchaguzi Mkuu wa Oktoba 29, tunakumbushwa ukweli mchungu: uharibifu wa mali na matusi mtandaoni hauna maana yoyote katika mustakabali wa taifa hili.
Wakati taifa linahitaji umoja, uzalendo, na maamuzi ya busara, vitendo vya uhujumu na mihemko hasi vinajaribu kuharibu jasho la Watanzania wengi. Kura itaamua tunaenda wapi, na sote lazima tushiriki kulinda yale ambayo tayari tumeyajenga.
Urithi wa Taifa: Mabillioni ya Shilingi katika hatari
Tanzania imewekeza mabilioni ya shilingi katika kujenga miundombinu ya kisasa: barabara, shule, hospitali, na miradi mikubwa ya usafiri wa umma kama vile Mabasi ya Mwendokasi (BRT) jijini Dar es Salaam. Huu si urithi wa mtu binafsi; ni mali ya taifa, ni damu na jasho la walipa kodi, na ni urithi wa kizazi hiki na vizazi vijavyo.
Mradi wa BRT ni mfano hai wa mafanikio ya Serikali ya Awamu ya Sita chini ya Rais Dkt. Samia Suluhu Hassan. Awamu ya Pili (kilomita 20.3) imekamilika, huku Awamu ya Tatu (km 23.3) na ya Nne (km 30.1) zikiendelea. Mradi huu unahudumia mamia ya maelfu kila siku, ukiunganisha wananchi na masoko, shule, hospitali, na maeneo ya kazi. Kazi inafanyika, na mafanikio yanasonga mbele.
Uharibifu: Uhujumu wa Taifa kwa Vitendo
Licha ya uwekezaji huu mkubwa, bado tunaona idadi ndogo ya watu wasio na uzalendo wakijihusisha na uharibifu. Huu si upuuzi wa kawaida – huu ni uhujumu wa taifa:
Vifaa vya Usalama Kuibiwa: Nyundo za dharura zinaibwa, vizimamoto vinavunjwa. Athari zake ni kubwa: Wakati mabasi yanapopata ajali, abiria wanakosa msaada kwa sababu vifaa muhimu vya usalama vimeibwa, na uhai unakuwa rehani.
Mali Zinafutika: Mabasi na vituo vinapigwa mawe. Kila kioo kinachovunjwa ni pesa za walipa kodi zinazopotea.
Mazingira Kufifia: Miti iliyopandwa barabarani hukatwa, na kuwaibia watoto wetu mazingira ya kijani na safi ya kesho.
Rais Samia amekwishaonya kwa kauli thabiti: “Uharibifu wa mali za umma ni sawa na kuhujumu taifa.” Hili ni agizo la kizalendo: Kila Mtanzania anapaswa kuwa mlinzi wa mali za umma kama anavyolinda nyumba na mali zake binafsi.
Kura Yako Oktoba 29: Kichocheo cha Ulinzi na Uwajibikaji
Oktoba 29 tunatiki siyo tu kwa ajili ya kuendeleza miradi mikubwa kama BRT na Hospitali mpya 50 za wilaya; tunatiki kwa ajili ya kuimarisha sheria na ulinzi wa mali hizo.
Chagua Msimamo wa Uzalendo: Kura yako inamchagua kiongozi mwenye uwezo wa kuimarisha mifumo ya sheria, kufanya uchunguzi uendelee kwa watuhumiwa wa uharibifu, na kuondoa uzembe wa wachache unaoharibu jasho la wengi.
Linda Jasho Lako: Mali za umma ni mali ya familia zetu, watoto wetu, na kizazi kinachokuja. Kura yako ni sauti inayodai uwajibikaji kutoka kwa Serikali ili kulinda miundombinu hiyo.
Tetea Maendeleo Endelevu: Tukitaka taifa lenye maendeleo ya kweli, lenye huduma bora na mazingira salama, lazima tuwe walinzi wa mali za umma. Kura ndiyo njia ya kuhamasisha elimu ya kizalendo kuanzia familia, shule, taasisi za dini, hadi vyombo vya habari.
Tukitoka kwenda kupiga kura Oktoba 29, tukumbuke: Tanzania ni yetu sote. Kila kura ni ahadi ya kuendeleza amani, kulinda urithi, na kuimarisha utu katika kila kona ya taifa.
Post a Comment