Msimamo wa Baraza la Wanawake wa CHADEMA (BAWACHA) kutaka Uchaguzi Mkuu wa mwaka 2025 urudiwe upya, umeibua mjadala mzito juu ya ukomavu wa kidemokrasia na uelewa wa kisheria miongoni mwa vyama vya upinzani nchini Tanzania.
Hatua ya baraza hilo, ikiongozwa na Mwenyekiti wake Sharifa Suleiman, inadai kuwa uchaguzi huo ulikuwa batili na haukuakisi matakwa ya wananchi, hoja inayojibiwa na wataalamu wa siasa kama jaribio la kulazimisha matakwa ya chama kimoja dhidi ya maamuzi ya mamilioni ya Watanzania waliojitokeza kupiga kura.
Kosa la kwanza na kubwa katika madai ya BAWACHA na CHADEMA linajikita katika misingi ya kisheria, hususan kanuni inayozuia mtu kulalamikia mchakato alioususia kwa hiari yake.
Katika lugha ya kisheria, huwezi kuwa na haki ya kuhoji uhalali wa matokeo ya uchaguzi ikiwa wewe mwenyewe uliamua kutoshiriki na kuwaacha wananchi waendelee na haki yao ya kikatiba.
Kwa kuwa uchaguzi wa 2025 ulifanyika kwa kufuata sheria na mifumo iliyopo, na vyama vingine vikaingia uwanjani, matokeo hayo yana uhalali wa kisheria ambao hauwezi kufutwa kwa tamko la habari. Kujiondoa kwa hiari kulimaanisha kuwa CHADEMA ilikubali kuwa mtazamaji wa maamuzi ya wenzao, na hivyo haina nguvu ya kisheria (Locus Standi) ya kutaka mchakato mzima ufutwe.
Aidha, dai la kutaka uchaguzi urudiwe ni dharau ya wazi kwa mamilioni ya wapiga kura waliojitokeza Novemba 2025 kumchagua Rais, Wabunge, na Madiwani. Demokrasia inajengwa juu ya sanduku la kura na siyo matakwa ya viongozi wa vyama mezani.
Unaposema uchaguzi uliopita haukuakisi matakwa ya wananchi, unakuwa unawatukana wanawake na wanaume walioamka alfajiri na kupanga mistari kwa amani kutoa sauti yao. Ni kosa la kimantiki kudai unalinda haki za wanawake waliokumbwa na unyanyasaji wa kisiasa, huku ukijaribu kufuta kura za mamilioni ya wanawake wengine waliochagua uongozi wa Rais Dkt. Samia Suluhu Hassan kama kielelezo cha imani yao kwa kiongozi mwanamke.
Kutaka Rais "ajitafakari" na kuitisha uchaguzi mpya ni sawa na kutaka kuingiza nchi kwenye mgogoro wa kikatiba usio na sababu za msingi.
Serikali inaongozwa kwa mujibu wa Katiba na siyo kwa shinikizo la mitaani au matamko ya majukwaani. Ikiwa CHADEMA iliamini kuwa mifumo ilikuwa na mapungufu, njia pekee ya kisheria na kidemokrasia ilikuwa ni kushiriki, kupata wawakilishi, na kuleta mabadiliko hayo kupitia Bunge.
Kwa kugoma kushiriki, walijinyima wenyewe fursa ya kisheria ya kuleta marekebisho wanayoyatafuta leo. Kulazimisha nchi kurudia uchaguzi ni kuhujumu uchumi wa taifa, kwani rasilimali zinazohitajika ni kubwa na zinapaswa kuelekezwa kwenye miradi ya maendeleo kama afya na miundombinu.
Ni dhahiri kuwa msimamo wa BAWACHA unalenga kutengeneza taharuki na hofu miongoni mwa wananchi ili kuifanya serikali ionekane haina uhalali wa kimataifa. Hata hivyo, ukweli unabaki kuwa Rais Samia alichaguliwa na Watanzania na mamlaka yake ni halali kwa mujibu wa sheria za nchi.
Vyama vya upinzani vinapaswa kujifunza kuwa siasa za kususia mikutano ya kidemokrasia na kisha kulalamika matokeo ni mchezo uliopitwa na wakati. Tanzania inasonga mbele kwa amani na maendeleo, na kila mwananchi anapaswa kuwa makini na sauti zinazotaka kuifanya nchi isitawalike kwa kusingizia "haki" ilhali ni njaa ya madaraka.
🥃🍶 TUMIA VINYWAJI BORA VYA EAST AFRICAN SPIRITS – BEI RAFIKI, LADHA SAFI BILA HARUFU MBAYA
Wasiliana nasi:
📍 East African Spirits (T) Ltd
📞 +255 767 650 806 | +255 652 096 254
Post a Comment