JIMOTOLI JILALA MADUKA AUNGANA NA SERIKALI MKOANI KATAVI KATIKA ZOEZI LA UPANDAJI MITI

Katibu wa Jumuiya ya Wazazi wa Chama Cha Mapinduzi (CCM) Wilaya ya Mpanda, Ndugu Jimotoli Jilala Maduka, katikati akipanda mti.

Katibu wa Jumuiya ya Wazazi wa Chama Cha Mapinduzi (CCM) Wilaya ya Mpanda, Ndugu Jimotoli Jilala Maduka, leo tarehe 28 Januari 2026 ameshiriki kikamilifu zoezi la upandaji wa miti lililofanyika katika Kata ya Shanwe, Manispaa ya Mpanda, Mkoa wa Katavi, ikiwa ni sehemu ya kuunga mkono juhudi za Rais wa Jamhuri ya Muungano wa Tanzania, Dkt. Samia Suluhu Hassan, katika kulinda mazingira.

Ndugu Maduka ameshiriki zoezi hilo kwa niaba ya Katibu wa CCM Wilaya ya Mpanda, Ndugu Musa Ramadhan Mwevi, katika zoezi lililoongozwa na Mkuu wa Mkoa wa Katavi, Bi. Mwamvua Mrindoko, likihusisha viongozi wa Serikali, Chama na wananchi wa Mkoa wa Katavi.

Katika zoezi hilo, Ndugu Jimotoli Jilala Maduka ameonesha mshikamano na uzalendo kwa kushiriki moja kwa moja upandaji wa miti, akieleza kuwa Jumuiya ya Wazazi CCM itaendelea kuwa mstari wa mbele katika kuhamasisha jamii kushiriki kikamilifu katika utunzaji wa mazingira kama sehemu ya wajibu wa kizalendo na maendeleo endelevu ya Taifa.

Ndugu Maduka amesisitiza kuwa upandaji wa miti ni ajenda ya kudumu inayogusa maisha ya wananchi moja kwa moja, hivyo Jumuiya ya Wazazi CCM Wilaya ya Mpanda itaendelea kushirikiana na Serikali na wananchi katika kuhamasisha upandaji miti kuanzia ngazi ya familia hadi jamii kwa ujumla.

Akizungumza wakati wa zoezi hilo, Mkuu wa Mkoa wa Katavi, Bi. Mwamvua Mrindoko, amewahamasisha wananchi wa Kata ya Shanwe, Manispaa ya Mpanda na Mkoa wa Katavi kwa ujumla kupanda miti katika kila mtaa ili kuboresha na kutunza mazingira ya maeneo wanayoishi.

Amesisitiza umuhimu wa upandaji miti katika maeneo muhimu yakiwemo ofisi za kazi, shule, hospitali, barabara, makazi ya wananchi pamoja na maeneo mengine ya kijamii.

Bi. Mrindoko ameeleza kuwa kila mtaa na kila kaya inapaswa kupanda angalau miche mitatu au zaidi kama mfano wa kuigwa katika jamii, hatua itakayosaidia kuleta muonekano mzuri wa mazingira na kuimarisha utunzaji wa rasilimali asilia katika Mkoa wa Katavi.

Katika hatua nyingine, Mkuu wa Mkoa wa Katavi amewahamasisha wananchi kuwa mabalozi wazuri wa elimu kwa kuhakikisha watoto wanapelekwa shule kuendelea na masomo ya elimu ya msingi na sekondari, akisisitiza kuwa kila mwananchi ana wajibu wa kuhamasisha zoezi hilo nyumba kwa nyumba.

Akizungumzia suala la elimu, Ndugu Jimotoli Jilala Maduka ameungana na Mkuu wa Mkoa kwa kusisitiza umuhimu wa Jumuiya ya Wazazi CCM kushiriki kikamilifu katika kuhimiza mahudhurio ya wanafunzi shuleni, akieleza kuwa elimu ni msingi wa maendeleo ya familia na Taifa kwa ujumla.

Aidha, Bi. Mrindoko amewahimiza wananchi kushiriki zoezi la upandaji miti kila tarehe 27 ya kila mwezi katika wilaya zote za Mkoa wa Katavi, kama sehemu ya kuunga mkono juhudi za Rais Dkt. Samia Suluhu Hassan katika kulinda mazingira na kukabiliana na athari za mabadiliko ya tabia ya nchi.

Naye Ndugu Jimotoli Jilala Maduka ameeleza kuwa Jumuiya ya Wazazi CCM Wilaya ya Mpanda itaendelea kuhamasisha wanachama na wananchi kushiriki zoezi hilo la kila mwezi, akibainisha kuwa upandaji miti ni urithi muhimu kwa vizazi vijavyo.

Zoezi hilo pia limeshuhudiwa na Mkuu wa Wilaya ya Mpanda, Bi. Jamila Yusuph, ambaye ameshiriki kupanda miti pamoja na Mkuu wa Mkoa wa Katavi kama ishara ya umoja na mshikamano wa viongozi katika kumuunga mkono Rais wa Jamhuri ya Muungano wa Tanzania.

Mkuu wa Wilaya ametumia fursa hiyo kuwakumbusha wananchi wa Wilaya ya Mpanda umuhimu wa kuwapeleka watoto shule na kuwa mabalozi wa elimu katika jamii.

Zoezi la upandaji miti limeelezwa kuwa ni hatua muhimu ya kuimarisha utunzaji wa mazingira, kuendeleza rasilimali asilia na kuimarisha umoja na ushirikiano wa jamii katika Mkoa wa Katavi.

Aidha, zoezi hilo limefanyika sambamba na kumbukizi ya siku ya kuzaliwa kwa Rais wa Jamhuri ya Muungano wa Tanzania, Dkt. Samia Suluhu Hassan, ambapo limechukuliwa kama ishara ya heshima, uzalendo, mshikamano na upendo kwa kiongozi mkuu wa nchi.

Kauli mbiu ya zoezi hilo ilikuwa:
“UZALENDO NI KUTUNZA MAZINGIRA, SHIRIKI KUPANDA MITI.”