KATIKA kile kinachoonekana kuwa ni muendelezo wa falsafa ya Serikali ya Awamu ya Sita ya "Kazi Iendelee" kwa vitendo na matokeo ya haraka, Katibu Mkuu wa Wizara ya Viwanda na Biashara, Balozi Waziri Rajab Salum, amezitaka taasisi zote zilizo chini ya wizara hiyo kuacha urasimu na kugeuka kuwa chachu ya maendeleo badala ya kuwa vipingamizi kwa wajasiriamali na waanzilishi wa viwanda nchini.
Akizungumza kwa mamlaka wakati wa ziara yake ya kikazi katika Shirika la Utafiti na Maendeleo ya Viwanda Tanzania (TIRDO) mkoani Dar es Salaam, Februari 19, 2026, Balozi Salum ametoa ujumbe mzito: Zama za kukwamisha wabunifu kwa kigezo cha taratibu zisizo na tija zimepitwa na wakati.
Amesema kuwa jukumu la msingi la taasisi hizo ni kuweka mikakati thabiti itakayowasaidia wazalishaji wa ndani kupata mikopo na mitaji, jambo ambalo ndilo mhimili wa ushindani wa bidhaa za Tanzania katika masoko ya kimataifa.
"Taasisi hizi hazikuundwa ili kuwa kuta za kuzuia ndoto za Watanzania, bali ziwe madaraja ya kuwavusha wajasiriamali kuelekea kwenye mafanikio. Bila mitaji na mazingira wezeshi, juhudi za viwanda vya ndani zitabaki kuwa ndoto," alisisitiza Balozi Salum.
Balozi huyo hakusita kuliweka shirika la TIRDO katika mzani wa uwajibikaji, akilitaka kuongeza kasi ya kutangaza huduma zake kwa umma. Amesema kuwa ipo haja ya wananchi na wazalishaji kufahamu kwa kina fursa za ushauri wa kitaalamu na tafiti zinazotolewa na shirika hilo ili kuboresha ubora wa bidhaa za Kitanzania.
Kwa mujibu wa Balozi Salum, uelewa wa umma juu ya tafiti hizi ndio utakaowapa wazalishaji wetu makali ya ushindani na kuifanya nembo ya "Made in Tanzania" kuwa tishio sokoni.
Aidha Katibu Mkuu huyo ametoa wito kwa TIRDO kugeuka kuwa kitovu cha utafiti kinachowafikia vijana kwa wingi, akiwataka watumishi wa wizara hiyo kuvaa uhusika kamili katika kutatua kero za mitaji.
Alinyoosha kidole kwenye changamoto ya taasisi za kifedha zinazodai dhamana (collateral) kubwa kupitiliza, jambo ambalo ameliita kuwa ni 'pingu' kwa wamiliki wa viwanda na akaitaka wizara kusimamia vyema upatikanaji wa suluhu za kifedha zinazogusa uhalisia wa mjasiriamali wa Kitanzania.
Ujumbe huu wa Balozi Salum unakuja wakati ambapo Serikali ya Rais Samia Suluhu Hassan imeweka mkazo wa kipekee katika kuimarisha sekta binafsi na kuhakikisha kuwa kila taasisi ya umma inafanya kazi kwa ufanisi (results-oriented) ili kuchochea ukuaji wa haraka wa uchumi wa taifa.
🥃🍶 TUMIA VINYWAJI BORA VYA KAMPUNI YA EAST AFRICAN SPIRITS – BEI RAFIKI, LADHA SAFI BILA HARUFU MBAYA
Wasiliana nasi:
📍 East African Spirits (T) Ltd
📞 +255 767 650 806 | +255 652 096 254
Post a Comment