MPIGA PICHA WA OFISI YA MKUU WA MKOA WA SHINYANGA AFARIKI DUNIA KATIKA AJALI, WENGINE 7 WAJERUHIWA AKIWEMO MWANDISHI WA HABARI WA ITV

Mazishi ya aliyekuwa Mpiga Picha wa Ofisi ya Mkuu wa Mkoa wa Shinyanga, marehemu Boaz Martine, yanafanyika leo Alhamisi Mei 21, 2026 katika makaburi ya familia yaliyopo eneo la Mwawaza, Manispaa ya Shinyanga.

Kwa mujibu wa ratiba iliyotolewa na Katibu Tawala Msaidizi Sehemu ya Utawala na Rasilimali Watu kutoka Ofisi ya Mkuu wa Mkoa wa Shinyanga, David Lyamongi, ibada ya kumuombea marehemu itaongozwa na Mashahidi wa Yehova kuanzia saa 7:00 mchana nyumbani kwa marehemu, nyuma ya Ofisi ya Mtendaji wa Kata ya Kitangili, Manispaa ya Shinyanga.

Baada ya ibada hiyo pamoja na salamu za rambirambi kutoka kwa ndugu, jamaa, marafiki na viongozi mbalimbali, mwili wa marehemu utasafirishwa kwenda katika makaburi ya familia yaliyopo Mwawaza kwa ajili ya mazishi yatakayofanyika majira ya saa 9:00 alasiri.

Marehemu Boaz Martine alifariki dunia Mei 19, 2026 kufuatia ajali ya barabarani iliyotokea katika eneo la Samuye mkoani Shinyanga. Ajali hiyo ilihusisha gari lililokuwa limebeba waandishi wa habari pamoja na watumishi wa Ofisi ya Mkuu wa Mkoa wa Shinyanga.

Akizungumza na waandishi wa habari Mei 20, 2026, Kamanda wa Polisi Mkoa wa Shinyanga, Janeth Magomi, alisema ajali hiyo ilisababishwa na uzembe wa dereva wa gari aina ya Toyota Harrier aliyekuwa akijaribu kulipita gari lililokuwa mbele yake bila kuchukua tahadhari stahiki.

Mbali na marehemu Boaz Martine, watu saba walijeruhiwa katika ajali hiyo akiwemo mwandishi wa habari wa ITV/Radio One Frank Mshana. Wengine ni Johnson James, Koplo Swahiba Msangi, Neema Madono (36), Rehema Edson (45), Shadia Omari (32) pamoja na dereva wa gari la Land Cruiser, Laurence Peter (34).

Majeruhi hao wanaendelea kupatiwa matibabu katika Hospitali ya Rufaa ya Mkoa wa Shinyanga huku baadhi yao wakihamishiwa Hospitali ya Rufaa ya Bugando jijini Mwanza kwa matibabu zaidi.

MPIGA PICHA WA OFISI YA MKUU WA MKOA WA SHINYANGA AFARIKI DUNIA KATIKA AJALI, WENGINE 7 WAJERUHIWA AKIWEMO MWANDISHI WA HABARI WA ITV

SHY TALENT FILMS - CONTENT YA MWISHO DRAMA

🥃🍶 TUMIA VINYWAJI BORA VYA KAMPUNI YA EAST AFRICAN SPIRITS – BEI RAFIKI, LADHA SAFI BILA HARUFU MBAYA

• Wasiliana nasi:
  📍 East African Spirits (T) Ltd
  📞 +255 767 650 806 | +255 652 096 254