*Na Augustino Tendwa**Mwandishi Maalum wa Masuala ya Kidiplomasia***DAR ES SALAAM** — Tanzania na China zimeahidi kuendeleza na kuimarisha ushirikiano wao wa muda mrefu katika sekta ya ulinzi, huku pande zote mbili zikisisitiza dhamira ya kudumisha amani, usalama na maendeleo ya pamoja.Kauli hiyo ilitolewa wakati Ubalozi wa Jamhuri ya Watu wa China nchini Tanzania ulipoandaa hafla maalum ya kuadhimisha miaka 99 tangu kuanzishwa kwa Jeshi la Ukombozi la Watu wa China (People's Liberation Army – PLA), hafla iliyowakutanisha viongozi wa Serikali, makamanda wa majeshi, wanadiplomasia, wafanyabiashara na marafiki wa China nchini.Mgeni rasmi katika hafla hiyo, Waziri wa Ulinzi na Jeshi la Kujenga Taifa, **Mhe. Simon Nyasaho**, alisema uhusiano kati ya Tanzania na China umeendelea kuwa mfano wa ushirikiano wa kweli unaojengwa katika misingi ya kuaminiana, kuheshimiana na mshikamano wa muda mrefu.Alieleza kuwa Serikali ya Tanzania inathamini mchango wa China katika kuimarisha sekta ya ulinzi kupitia ushirikiano kati ya Jeshi la Ukombozi la Watu wa China (PLA) na Jeshi la Wananchi wa Tanzania (JWTZ), ambao umejumuisha mafunzo ya kijeshi, kubadilishana uzoefu wa kitaalamu, kujenga uwezo wa taasisi na kuimarisha mazungumzo ya kimkakati.Kwa mujibu wa Waziri Nyasaho, ushirikiano huo umechangia kwa kiasi kikubwa kuongeza weledi wa wanajeshi wa Tanzania pamoja na kuimarisha uwezo wa JWTZ katika kutekeleza majukumu yake ya kulinda amani na usalama wa taifa.*"Ushirikiano wa muda mrefu kati ya PLA na JWTZ unaakisi uimara wa urafiki wa mataifa yetu mawili. Tanzania itaendelea kuuenzi na kuuimarisha ushirikiano huu kwa manufaa ya wananchi wetu na kwa ajili ya kuendeleza amani na usalama wa kikanda,"* alisema.Aliongeza kuwa ushirikiano wa kijeshi umeendelea kuwa nguzo muhimu ya Ushirikiano wa Kimkakati wa Kina kati ya Tanzania na China, huku ukichangia pia juhudi za kudumisha utulivu katika ukanda wa Afrika Mashariki na Bara la Afrika kwa ujumla.Awali akizungumza katika hafla hiyo, Balozi wa China nchini Tanzania aliwashukuru wageni kwa kushiriki maadhimisho hayo, akieleza kuwa ni fursa ya kutambua historia na mchango mkubwa wa Jeshi la Ukombozi la Watu wa China tangu kuanzishwa kwake tarehe 1 Agosti 1927 chini ya uongozi wa Chama cha Kikomunisti cha China.Alisema kwa kipindi cha karibu karne moja, PLA limepitia mageuzi makubwa na kuwa miongoni mwa majeshi ya kisasa na yenye weledi duniani, likiwa na jukumu la kulinda uhuru, mamlaka na mipaka ya China pamoja na kuchangia maendeleo ya taifa hilo.Balozi huyo alieleza kuwa mafanikio ya kiuchumi na kijamii ambayo China imeyapata katika miongo ya hivi karibuni yamewezeshwa pia na mazingira ya amani na utulivu yaliyolindwa na PLA.Aidha, alisema jeshi hilo limeendelea kutoa mchango mkubwa katika kuimarisha amani duniani kupitia ushiriki wake katika operesheni za kulinda amani za Umoja wa Mataifa, utoaji wa misaada ya kibinadamu, shughuli za kukabiliana na majanga pamoja na ushirikiano wa kimataifa katika kudhibiti silaha na kuzuia uenezaji wa silaha hatari.Akizungumzia uhusiano wa Tanzania na China, Balozi huyo alisema msingi wake uliwekwa na viongozi waasisi, Mwenyekiti Mao Zedong na Baba wa Taifa, Hayati Mwalimu Julius Kambarage Nyerere, ambao walijenga urafiki uliotokana na usawa, kuheshimiana na mshikamano wa mataifa yanayoendelea.Alikumbusha kuwa katika miaka ya mwanzo ya Tanzania baada ya kupata uhuru, China ilikuwa miongoni mwa washirika muhimu waliotoa msaada katika kuimarisha sekta ya ulinzi kupitia mafunzo na ujenzi wa uwezo wa taasisi za kijeshi. Alisema ushirikiano huo ulienda sambamba na utekelezaji wa miradi mikubwa ya maendeleo ikiwemo Reli ya TAZARA, ambayo hadi leo inaendelea kuwa alama ya urafiki wa kudumu kati ya China na Afrika.Balozi huyo alisisitiza kuwa China iko tayari kuendelea kushirikiana na Tanzania katika maeneo mbalimbali yakiwemo ulinzi, biashara, uwekezaji, miundombinu, teknolojia, elimu na kubadilishana uzoefu kati ya wananchi wa mataifa hayo mawili.Alisema kadri PLA linavyoelekea kutimiza miaka 100 mwaka 2027, China itaendelea kushikilia sera ya maendeleo ya amani, kuheshimu mataifa mengine na kujenga mustakabali wa pamoja kwa manufaa ya dunia.Hafla hiyo ilihitimishwa kwa Tanzania na China kusisitiza dhamira yao ya kuendelea kuimarisha ushirikiano wa kijeshi na kidiplomasia, huku wakiahidi kuendeleza urafiki uliojengwa na viongozi waasisi wa mataifa hayo.Maadhimisho hayo hayakuwa tu kumbukizi ya miaka 99 ya Jeshi la Ukombozi la Watu wa China, bali pia yalidhihirisha uimara wa uhusiano wa kihistoria kati ya Tanzania na China—ushirikiano ambao unaendelea kustawi na kuwa chachu ya amani, usalama na maendeleo endelevu kwa manufaa ya mataifa yote mawili.
SHY TALENT FILMS - CONTENT YA MWISHO DRAMA
🥃🍶 TUMIA VINYWAJI BORA VYA KAMPUNI YA EAST AFRICAN SPIRITS – BEI RAFIKI, LADHA SAFI BILA HARUFU MBAYA
Wasiliana nasi:
📍 East African Spirits (T) Ltd
📞 +255 767 650 806 | +255 652 096 254.
Post a Comment