Na Respice
Swetu, Misalaba Media -Kasulu
Kufuatia
halmashauri ya wilaya ya Kasulu kufanya
vizuri katika mtihani wa darasa la nne, darasa la saba, kidato cha nne na
kidato cha sita iliyofanyika mwishoni mwa mwaka jana, zawadi za vyeti na pesa
taslimu zimetolewa kwa walimu na shule ikiwa ni sehemu ya motisha kwa matokeo
hayo.
Akizungumzia
tukio hilo, Kaimu mkurugenzi wa halmashauri ya wilaya ya Kasulu Emmanuel Ladislaus
alisema, pamoja na kuiita siku hiyo kuwa siku ya elimu, halmashauri ya wilaya
ya Kasulu inaitumia siku hiyo kama mwanzo wa msimu mpya wa elimu.
Siku hiyo
iliyofanyikia kwenye ukumbi wa chuo cha ualimu Kasulu pamoja na kutumika kwa
utoaji wa tuzo, liliambatana na majadliano yaliyotokana na taarifa ya elimu na
hoja za wadau mbalimbali walioalikwa katika siku hiyo.
Akifungua
kikao hicho cha siku ya elimu, afisaelimu wa mkoa wa Kigoma Paulina Ndigeza
aliyekuwa mgeni rasmi kwenye tukio hilo, amewapongeza walimu wa shule za msingi
na sekondari wa halmashauri ya wilaya ya Kasulu kwa kazi kubwa waliyoifanya.
Amesema
kuwa, katika mitihani iliyofanyika mwaka jana, ufaulu wa halmashauri ya wilaya
ya Kasulu umepanda ikilinganishwa na mwaka uliotangulia na kuifanya halmashauri
hiyo kushika nafasi ya pili kwenye matokeo ya mtihani wa upimaji darasa la nne
na kuwa katika nafasi kama hiyo katika mtihani wa kuhitimu darasa la saba.
“Matokeo
haya ni mazuri mmepanda kwa kiwango kikubwa na kuuwezesha na mkoa kupanda tofauti na miaka ya nyuma ambapo tulikuwa
nyuma kiasi cha kuona aibu kusema unatoka mkoa wa Kigoma sio kama ilivyo kwa
sasa ambapo hata nikienda popote natembea kifua mbele na kujidai kuwa natoka
mkoa wa Kigoma, hongereni sana,”
amesema.
Kwa upande
wa shule za sekondari, Ndigeza alizitolea mfano shule za sekondari za Muyowosi
na Kasangezi ambazo ufaulu wake umepanda na kuwa miongoni mwa shule
zinazoongoza kimkoa kwenye matokeo ya
mtihani wa kuhitimu kidato cha sita.
Awali kabla
ya kufungua kikao hicho, kulifanyika maonesho ya zana za kujifunzia na
kufundishia kutoka kwa wadau mbalimbali likiwemo shirika la Save the children
na IRC kupitia mradi wa play matters
unaohimiza ufundishaji wa kutumia michezo.
Waalikwa
wengine kwaliohudhuria katika siku hiyo walikuwa ni kutoka shirika la World
Vision, NMB, Mboni ya vijana, viongozi wa madhehebu ya dini na wazee maarufu.
Akiahirisha
kikao hicho, afisaelimu wa mkoa amewataka walimu wa halmashauri ya wilaya ya
Kasulu kuacha kuridhika na mafanikio hayo na badala yake wajitume zaidi.
”Pamoja na mafanikio makubwa mliyoyapata, mnatakiwa mjitume zaidi ili tufikie lengo la mkoa wa Kigoma la
kufaulisha kwa asilimia 95, nina hakika tutaweza”, amesema.
Post a Comment