KAMATI YA AFYA YA MSINGI YA WILAYA YA SHINYANGA YAJENGA UWEZO KUELEKEA KAMPENI YA CHANJO YA POLIO

Kamati ya Afya ya Msingi ya Wilaya (Primary Health Care – PHC) katika Wilaya ya Shinyanga imefanya kikao muhimu cha ngazi ya wilaya chenye lengo la kujenga uelewa na kuimarisha uratibu kuelekea kampeni ya chanjo ya polio inayotarajiwa kuanza rasmi tarehe 24 Machi 2026.

Akizungumza katika kikao hicho, Katibu Tawala wa Wilaya ya Shinyanga, Saidi Rafaeli Butinga, alisisitiza umuhimu wa ushirikiano wa viongozi na wataalamu katika kuhakikisha kampeni hiyo inafanikiwa kwa kiwango kikubwa.

“Leo tumekutana kujengeana uwezo na uelewa. Tunahitaji utekelezaji mkubwa kwa wananchi wetu. Ni muhimu kukumbuka kuwa kinga ni bora kuliko tiba, hasa kwa ugonjwa wa polio ambao una madhara makubwa,” alisema Butinga.

Aliongeza kuwa serikali inaendelea kufanya vizuri katika sekta ya afya, hivyo ni wajibu wa viongozi wote wakiwemo wajumbe wa kamati za usalama, amani, pamoja na wanasiasa kushirikiana na wataalamu kuhamasisha jamii kushiriki kikamilifu katika zoezi hilo.

Chanjo ya Matone Kuwafikia Watoto Nyumba kwa Nyumba

Mganga mkuu wa Manispaa ya Shinyanga, Dkt. Elisha Robert, alieleza kuwa kampeni hiyo inahusisha utoaji wa chanjo ya polio ya matone kwa watoto wote wenye umri chini ya miaka 10.

Alifafanua kuwa kampeni hiyo inaendeshwa na Wizara ya Afya kwa kushirikiana na Ofisi ya Waziri Mkuu pamoja na wadau mbalimbali wakiwemo WHO, UNICEF na Red Cross.

“Tumebaini uwepo wa vimelea vya polio katika baadhi ya maeneo, hivyo tumeamua kuja na kampeni hii ya kinga. Zoezi litafanyika nyumba kwa nyumba na katika maeneo yote yenye watoto,” alisema Dkt. Robert.

Kamati Yawekewa Mkazo Katika Uhamasishaji

Kwa upande wake, Mratibu wa Chanjo Manispaa ya Shinyanga, Ramadhan Maneno Hamimu, alieleza kuwa Kamati ya Afya ya Msingi ina jukumu muhimu la kimkakati katika kufanikisha kampeni hiyo.

Alibainisha majukumu hayo kuwa ni pamoja na:

Kuratibu utekelezaji wa kampeni
Kusimamia uhamasishaji kwa jamii
Kufuatilia usahihi wa taarifa zinazotolewa kwa wananchi
Kuhakikisha hakuna mtoto anayeachwa nyuma

“Lengo letu ni kuhakikisha kila mjumbe anatoka hapa akiwa balozi mzuri wa kampeni hii, mwenye uwezo wa kuelezea kwa usahihi umuhimu wa chanjo ya polio,” alisisitiza Hamimu.

Tahadhari Dhidi ya Kusambaa kwa Virusi

Akizungumza kwa niaba ya Ofisi ya Waziri Mkuu – TAMISEMI, Dinah Atinda, alieleza kuwa kampeni hiyo inalenga kuzuia kusambaa kwa virusi vilivyobainika katika mazingira, hususan kwenye maji taka katika Mkoa wa Mwanza.

Alieleza kuwa kutokana na ukaribu wa kijiografia, mikoa jirani ikiwemo Shinyanga, Geita, Mara, Tabora, Simiyu na Singida imejumuishwa katika kampeni hiyo.

“Hii ni hatua ya tahadhari. Dozi ya kwanza itatolewa sasa, na dozi ya pili itatolewa mwezi Mei. Chanjo hizi hazitolewi bila sababu—zinatokana na ufuatiliaji wa kitaalamu,” alieleza.

Aliongeza kuwa maandalizi yamekamilika ikiwa ni pamoja na usambazaji wa chanjo katika vituo vyote vya afya na mafunzo kwa watoa huduma.

Lengo ni Kuwafikia Zaidi ya Watoto 780,000

Afisa Programu kutoka Wizara ya Afya, Anne Shuma, alibainisha kuwa kampeni hiyo inalenga kuwafikia watoto zaidi ya 781,186 katika Mkoa wa Shinyanga.

Alieleza kuwa tayari jitihada za uhamasishaji zimeanza kupitia vyombo vya habari na njia mbalimbali za mawasiliano ili kuhakikisha jamii inapata taarifa sahihi.

“Tunasisitiza kuwa kwa sasa hatuna mtoto aliyegundulika kuwa na polio. Hii ni hatua ya tahadhari baada ya kubaini vimelea. Ni muhimu jamii ikaelewa hilo na kujitokeza kwa wingi,” alisema Anne Shuma.

Wito kwa Jamii

Kwa ujumla, viongozi wote walitoa wito kwa wananchi kujitokeza kwa wingi kushiriki katika kampeni hiyo muhimu, huku wakihimizwa kuwapeleka watoto wote chini ya miaka 10 kupata chanjo ya matone.

Kikao hicho kimeweka msingi imara wa ushirikiano kati ya viongozi na wataalamu, kwa lengo la kuhakikisha kampeni ya chanjo ya polio inafanikiwa na kulinda afya ya watoto pamoja na jamii kwa ujumla.