SERIKALI YAZINDUA KAMPENI YA CHANJO YA POLIO SHINYANGA

Uzoefu na Ubunifu: &nbsp;Timu yetu ya wataalamu ina uzoefu wa miaka mingi katika sekta ya habari na uchapishaji wa maudhui.
Ubora na Uaminifu: &nbsp;Tunajivunia kutoa huduma bora na za kuaminika kwa wateja wetu.
Upatikanaji: &nbsp;Tupo mtandaoni muda wote, tukihakikisha unapata taarifa muhimu kwa wakati.

Serikali imezindua kampeni maalum ya chanjo ya Polio mkoani Shinyanga kufuatia kuwepo kwa hatari ya maambukizi ya ugonjwa huo, baada ya kubainika kwa vimelea vyake katika maji taka jijini Mwanza.

Akizungumza kuhusu kampeni hiyo, Mganga Mkuu wa Mkoa wa Shinyanga, Dkt. Yudas Ndungile, amesema hatua hiyo imelenga kuzuia kusambaa kwa ugonjwa wa Polio ambao hauna tiba, bali unazuilika kwa njia ya chanjo.

Amesisitiza kuwa chanjo hiyo ni salama kwa watoto wote walio chini ya umri wa miaka 10, huku akionya kuwa mtoto atakayekosa chanjo atakuwa kwenye hatari kubwa ya kuambukizwa ugonjwa huo.

Kwa upande wake, Katibu Tawala wa Mkoa wa Shinyanga, CP. Salum Hamduni, amewataka wazazi na walezi kujitokeza kwa wingi kuhakikisha watoto wote wanapatiwa chanjo hiyo muhimu ili kuwakinga dhidi ya ugonjwa wa Polio unaoweza kusababisha ulemavu wa kudumu au hata kifo.

Akizungumza Machi 23, 2026 katika kikao kazi cha hamasa ya kampeni hiyo, Hamduni amesema zoezi la utoaji chanjo litafanyika kuanzia Machi 24 hadi 27, 2026, likilenga kuwafikia watoto 781,166 wenye umri chini ya miaka 10 mkoani humo.

Baadhi ya washiriki wa kikao hicho wameipongeza Serikali kwa jitihada zake za kulinda afya ya watoto, wakieleza kuwa uwekezaji katika afya ya mtoto ni msingi muhimu wa kulinda kizazi cha sasa na cha baadaye, pamoja na kuchochea maendeleo ya taifa kwa ujumla.