Wakazi wa Mtaa wa Mbuyuni Kata ya Ndembezi Manispaa ya Shinyanga wamejitokeza kufanya usafi wa mazingira ikiwa ni maandalizi ya kujikinga na madhara yanayoweza kujitokeza kutokana na mvua za El Nino zinazotarajiwa kunyesha hivi karibuni.

Zoezi hilo limehusisha usafishaji wa mitaro, kuondoa taka ngumu na kufyeka vichaka katika barabara kuu inayoelekea Mtaa wa Dome, ambayo imetajwa kuwa ni miongoni mwa maeneo korofi yanayokumbwa na mafuriko mara kwa mara.

Akizungumza wakati wa zoezi hilo, Mwenyekiti wa Mtaa wa Mbuyuni, Bwana Seif Nassor Mohamed amesema zoezi hilo ni endelevu na linalenga kuhakikisha mtaa unabaki kuwa safi na salama.

Aidha, Mwenyekiti huyo amewataka wananchi kuchukua tahadhari mapema kutokana na dalili za mvua hizo kuonekana tayari katika baadhi ya maeneo ya mtaa huo.

Kwa upande wake, Mkazi wa Mtaa huo, Bwana Shaban ambaye alishiriki vema katika zoezi hilo, amewahimiza wananchi wenzake kuwa na umoja na mshikamano katika kuhakikisha mtaa wao unakuwa safi na salama wakati wote, siyo tu wakati wa mvua.

Naye Bi. Khadija Masenza, mkazi wa Mbuyuni, amesema usafi wa mitaro ni kipaumbele kwao kutokana na historia ya mtaa huo kujaa maji.

Zoezi la usafi wa mazingira katika Mtaa wa Mbuyuni linatajwa kuwa ni mfano wa kuigwa, ambapo wananchi wenyewe ndio wamekuwa mstari wa mbele bila kusubiri Manispaa, ikiwa ni utekelezaji wa kauli mbiu isemayo "Usafi ni Afya".