Taasisi ya Kuzuia na Kupambana na Rushwa (TAKUKURU) Mkoa wa Shinyanga imefanikiwa kurejesha jumla ya Shilingi 236,069,957.63 katika kipindi cha Aprili hadi Septemba 2026, kupitia udhibiti wa makusanyo ya mapato ya ndani, ufuatiliaji wa matumizi ya fedha za umma, uchunguzi na mashtaka.
Akizungumza
kuhusu mafanikio hayo, Naibu Mkuu wa TAKUKURU Mkoa wa Shinyanga, Mwamba
Masanja, amesema fedha hizo zimepatikana kupitia hatua mbalimbali
zilizochukuliwa na taasisi hiyo katika maeneo tofauti ya mkoa huo.
Amesema kati
ya fedha hizo, Shilingi 75,500,500 zimeokolewa baada ya ufuatiliaji wa
ukusanyaji wa mapato kupitia mashine za kielektroniki za POS katika mnada wa
Old Shinyanga, unaosimamiwa na Halmashauri ya Manispaa ya Shinyanga, ambapo
ilibainika kuwa baadhi ya mawakala walikusanya fedha za ushuru lakini
hawakuzifikisha benki kwa wakati kama taratibu zinavyotaka.
Aidha,
Shilingi 47,877,360 zimeokolewa baada ya TAKUKURU kufuatilia malipo ya wakulima
wa pamba katika msimu wa 2025/2026, Halmashauri ya Wilaya ya Kishapu, ambapo
kulikuwa na sintofahamu ya malipo ya wakulima licha ya kampuni zilizopewa
vibali vya kununua pamba kukabidhi fedha kwa vyama vya msingi vya ushirika
(AMCOS).
Katika hatua
nyingine, taasisi hiyo imefanikisha ukusanyaji wa Shilingi 35,129,844.63 kwa
kushirikiana na Halmashauri ya Manispaa ya Kahama kutoka kwa wadaiwa sugu wa
ushuru wa huduma (Service Levy) waliokuwa wamekwepa kulipa kwa muda mrefu.
Katika eneo
la ufuatiliaji wa miradi ya maendeleo, TAKUKURU imefanya ufuatiliaji wa
matumizi ya fedha katika mradi wa ujenzi wa miundombinu mipya katika Zahanati
ya Mwakitolyo, unaohusisha jengo la upasuaji na jengo la wazazi wenye thamani
ya Shilingi milioni 250.
Masanja
amesema ufuatiliaji huo ulibaini kutowasilishwa kwa baadhi ya malipo ya kodi ya
zuio (Withholding Tax), ambapo baada ya uchunguzi wa kina kiasi cha Shilingi
2,692,139 kililipwa.
Ameongeza
kuwa katika kipindi hicho, TAKUKURU Shinyanga imefuatilia matumizi ya fedha
katika miradi 10 ya maendeleo yenye thamani ya Shilingi bilioni 27.9 katika
sekta za elimu, afya, barabara, huduma za jamii na utawala.
Kuhusu elimu
kwa umma, amesema taasisi hiyo imeendelea kuishirikisha jamii katika mapambano
dhidi ya rushwa kupitia klabu 100 za wapinga rushwa, semina 44, mikutano ya
hadhara 41, maonesho 14, uandishi wa habari na makala saba pamoja na vipindi
saba vya redio.
Katika
upande wa uchunguzi na mashtaka, Masanja amesema TAKUKURU Shinyanga
imefanikisha kurejeshwa Serikalini kwa Shilingi 74,870,114 zilizotokana na
uchunguzi wa tuhuma mbalimbali za ubadhirifu wa mali za umma, baada ya
watuhumiwa kufikishwa mahakamani na kukiri makosa yao.
Amesema
katika kipindi hicho jumla ya malalamiko 134 yalipokelewa, ambapo 105 yalihusu
rushwa na 29 hayakuhusu rushwa. Malalamiko yaliyohusu rushwa yameanzishiwa
uchunguzi na yanaendelea kushughulikiwa katika hatua mbalimbali.
Aidha, kesi
13 ziliendelea mahakamani, huku kesi mpya saba zikifunguliwa, kesi saba
zikitolewa uamuzi na Jamhuri kushinda kesi sita.
Akizungumzia
mikakati ya kipindi kinachofuata, Masanja amesema TAKUKURU itaendelea
kuimarisha elimu kwa umma katika maeneo ya utoaji huduma, kufuatilia matumizi
ya fedha za umma katika miradi ya maendeleo, kusimamia makusanyo ya mapato ya
ndani na kuimarisha uadilifu katika taasisi za umma.
Amewataka
wananchi na taasisi za umma mkoani Shinyanga kuzingatia misingi ya uadilifu na
maadili ya kazi, huku akihimiza wananchi kushirikiana na TAKUKURU kwa kutoa
taarifa za vitendo vya rushwa ili kulinda rasilimali za umma na kuhakikisha
huduma zinatolewa kwa haki.
Wananchi wenye taarifa za vitendo vya rushwa wametakiwa kufika katika ofisi za TAKUKURU zilizo karibu nao au kupiga simu ya bure namba 113.
PROFESSOR MGOKO EPISODE 07
🥃🍶 TUMIA VINYWAJI BORA VYA KAMPUNI YA EAST AFRICAN SPIRITS – BEI RAFIKI, LADHA SAFI BILA HARUFU MBAYA
Wasiliana nasi:
📍 East African Spirits (T) Ltd
📞 +255 767 650 806 | +255 652 096 254
Post a Comment