Askofu mkuu mstaafu wa Jimbo kuu la Dar es Salaam Mwadhama Polycarp Kardinali Pengo, leo Jumatatu tarehe 16.12.2024, amewasili Jimboni Shinyanga kwa ziara yake ya siku nne, ambapo pamoja na mambo mengine, atampa daraja takatifu la Ushemasi Frateri Deusdedith Nkandi wa Parokia ya Buhangija Jimbo Katoliki Shinyanga.
Kardinali Pengo amepokelewa katika uwanja wa ndege wa Mwanza majira ya saa tano asubuhi na mwenyeji wake Askofu wa Jimbo Katoliki Shinyanga Mhashamu Liberatus Sangu, ambaye alikuwa ameambatana na Mapadre.
Aidha, msafara wa Kardinali pengo umepokelewa majira ya saa saba mchana na Mapadre, watawa na waamini wa Jimbo la Shinyanga, katika eneo la Nyasamba mpakani mwa Jimbo kuu la Mwanza na Jimbo la Shinyanga.
Akiwa Jimboni Shinyanga, Kardinali Pengo atakutana na kuzungumza na makundi mbalimbali, ambapo kesho Jumanne tarehe 17.12.2024, saa 4:00 hadi saa 5:30 asubuhi, atakutana na kuzungumza na Mapadre katika makazi mapya ya Askofu huko Ibadakuli ambapo kuanzia saa 6:30 mchana atashiriki chakula cha pamoja na Mapadre na viongozi wa Halmashauri Walei katika Parokia ya Lubaga.
Keshokutwa Jumatano tarehe 18.12.2024, kuanzia saa 4:00 hadi saa 6:00 mchana, Kardinali Pengo atakutana na kuzungumza na Mamonsinyori katika Parokia ya Buhangija, na kuanzia saa 6:30 hadi saa 8:00 mchana atashiriki chakula cha pamoja na Mapadre na Shemasi mtarajiwa Deusdedith Nkandi, ambapo saa 9:30 alasiri msafara wake utaelekea katika Kanisa kuu la Mama mwenye huruma Ngokolo mjini Shinyanga kwa maandalizi ya Ibada ya masifu ya jioni, itakayoanza saa 11:00 jioni.
Alhamisi tarehe 19.12.2024, kuanzia saa 4:00 asubuhi hadi saa 8:00 mchana, Kardinali Pengo ataongoza Misa takatifu ya Ushemasi katika Kanisa kuu la Mama mwenye huruma Ngokolo mjini Shinyanga, ambapo kupitia Misa hiyo, atampa Daraja takatifu la Ushemasi Frateri Deusdedith Nkandi.
Kardinali Pengo atarudi Jijini Dar es Salaam siku ya Ijumaa tarehe 20.12.2024, kupitia uwanja wa ndege wa Mwanza.
Post a Comment