Kadiri Taifa linavyojiandaa kwa Uchaguzi Mkuu wa Oktoba 29, 2025, jukumu la viongozi wa dini limekuwa muhimu zaidi kuliko wakati mwingine wowote. Tanzania, inayojulikana kwa amani, umoja na tofauti za kitamaduni, ina jukumu la kihistoria la kuendelea kuwa mfano wa upendo na utulivu barani Afrika.
Kwa kuwa zaidi ya asilimia 99 ya Watanzania ni waumini wa dini mbalimbali, Waislamu, Wakristo na imani za asili, viongozi wa dini wana nafasi ya kipekee katika kuhakikisha maelewano na mshikamano vinadumu. Dini inaweza kuwa nguvu ya umoja, si chachu ya mgawanyiko.
Tangu enzi za Baba wa Taifa Mwalimu Julius Kambarage Nyerere, maelewano ya kidini yamekuwa nguzo ya amani ya Taifa. Mwalimu alisisitiza ujamaa na usawa, akijenga misingi ya kuheshimiana bila kujali dini.
Hata katika miaka ya 1990, wakati Tanzania ilipokuwa inapitia mabadiliko kuelekea mfumo wa vyama vingi, viongozi wa dini waliongoza juhudi za kudumisha mazungumzo badala ya migogoro, wakisaidia Nchi kuepuka machafuko yaliyotokea katika mataifa jirani.
Lakini leo, tunashuhudia sauti za wachache mitandaoni zikihamasisha vurugu, migawanyiko na maandamano yasiyo na msingi. Sauti hizi za chuki haziwakilishi Watanzania wengi wanaotamani uchaguzi wa amani na ushiriki wa kidemokrasia.
Katika kipindi hiki wadau wengi wameonya kuwa mtazamo wa kuona Amani na Haki kama vitu vinavyopingana unaweza kuhatarisha umoja wa kitaifa.
Viongozi wa dini wamehimizwa kutumia ushawishi wao kuhakikisha kuwa nyumba za ibada zinabaki kuwa vituo vya sala na umoja, na si majukwaa ya kueneza migawanyiko ya kisiasa.
Wito huu unasisitizwa na kauli za vitabu vitakatifu: Qur’an (49:9) "Fanyeni amani kati yao," na Zaburi (34:14) "Tafuteni amani na kuifuata," zikikumbusha kwamba Amani ni wajibu wa kimsingi wa kiimani.
Licha ya wito huo, kumekuwa na maoni makali kutoka kwa wananchi wakisema kwamba Amani bila Haki si zaidi ya 'Uvumilivu' na kwamba viongozi wa dini wanakwepa wajibu wao wa kuitetea Haki kwanza.
Utamaduni wa Kistaarabu: Kupingana Bila Kupigana
Wakati mjadala huu ukiendelea, wataalamu wa jamii na siasa wanasisitiza kuwa mchango mkuu wa Taifa la Tanzania kwa dunia ni kuendeleza utamaduni wa kistaarabu wa kupingana bila kupigana.
"Maendeleo ya kweli, kama alivyosema Mwalimu Nyerere, yanatokana na maelewano, si migogoro. Sisi kama Taifa, tunapaswa kuelewa kwamba kuna haja ya kutoa maoni tofauti, kukosoana, na kudai haki, lakini yote haya yafanyike ndani ya utaratibu wa kisheria na bila kuhatarisha uhai na ustawi wa mwenzetu," alisema mmoja wa wataalamu hao.
Wito mkuu kwa viongozi wote wa dini na wa kisiasa, pamoja na wananchi, ni kutumia sanduku la kura kama daraja la amani, na si bomu la migawanyiko. Uchaguzi unapaswa kuwa fursa ya kudumisha umoja, huku wananchi wote wakihamasishwa kutojihusisha na miito yoyote ya vurugu au machafuko inayoenezwa hasa kupitia mitandao ya kijamii.
Amani na Haki ni nguzo mbili zinazoweza kufanya kazi pamoja, na si lazima zipingane. Wajibu wetu sote ni kuhakikisha kwamba kupitia mjadala wenye staha na utaratibu wa kisheria, tunajenga Tanzania yenye ustawi na maendeleo yanayoambatana na utulivu kwa vizazi vijavyo.
Post a Comment